الماتى وبلىسى پوليسياسىنىڭ باسپا ءسوز قىزمەتى الەۋمەتتىك جەلىدە پايدا بولعان اقپاراتقا بايلانىستى مالىمدەمە جاسادى، دەپ حابارلايدى Dalanews.kz.
ءتارتىپ ساقشىلارى اقپاراتقا جاۋاپ بەرىپ، تالعار اۋدانى تۇزدىباستاۋ اۋىلىنداعى ءدامحانالاردىڭ ءبىرىنىڭ ماڭىندا اتىس بولدى دەگەن اقپارات تاراعانى شىندىققا سايكەس كەلمەيتىنىن ءتۇسىندىردى.
بەلگىلى بولعانداي، مەكەمە قوناقتارى سوزگە كەلىپ قالىپ، جانجالعا ۇلاسقان. وقيعاعا سەنىپ تاپسىرىلعان ايماقتى پاترۋلدەپ جۇرگەن پوليسەيلەر جەدەل تۇردە ارالاسىپ، جاعدايدى رەتتەدى.
بۇزاقىلىق ارەكەتتەر فاكتىسى بويىنشا قىلمىستىق ءىس قوزعالدى. بارلىق قاتىسۋشىلار پوليسياعا جەتكىزىلدى.
زارداپ شەككەندەر جوق. قازىرگى ۋاقىتتا وقيعانىڭ ءمان-جايى انىقتالۋدا.
“ءبىز تەك رەسمي دەرەككوزدەرگە سەنۋگە شاقىرامىز جانە جالعان اقپاراتتى تاراتۋ زاڭ بويىنشا جازالاناتىنىن، ءتىپتى قىلمىستىق جاۋاپكەرشىلىككە دەيىن اكەلۋى مۇمكىن ەكەنىن ەسكە سالامىز”، – دەدى ءتارتىپ ساقشىلارى.
ەسكە سالايىق، بۇعان دەيىن تالعارلىق 16 جاستاعى شەرزاتتىڭ ءولىمى ءدۇيىم جۇرتتى دۇرلىكتىرگەن ەدى. جاس جىگىت ءبىر توپ بۇزاقىنىڭ قولىنان اجال قۇشتى.
جانجال جىگىتتىڭ وتباسى جالعا الاتىن دۇكەننەن باستالعان. تۋىستارىنىڭ ايتۋىنشا، ساۋدا نۇكتەسىنە كەلگەن ساتىپ الۋشى سىرا الىپ، اقشاسىن تولەۋدەن باس تارتقان. وسى جاعدايدان كەيىن توبەلەس باستالعان.
كامەلەتكە تولماعان بالانى ءولتىرۋ فاكتىسى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى.
قازىرگى تاڭدا كىنالى دەپ تانىلعان 7 ادام ۇستالىپ، ۋاقىتشا ۇستاۋ يزولياتورىنا قاماۋعا الىنعان.
