تايلاندتا ٶتە شالا تۋعان نەرەستەنٸڭ ٶمٸرٸن قازاقستاندىق دەرٸگەرلەر ساقتاپ قالدى. ەكٸ ايعا سوزىلعان قارقىندى ەمنەن كەيٸن سەبي پەدياترييا جەنە بالالار حيرۋرگيياسى عىلىمي ورتالىعىنان ٷيٸنە شىعارىلدى, دەپ حابارلايدى dalanews.kz.
دەرٸگەرلەردٸڭ مەلٸمەتٸنشە, بٸر جارىم ايلىق سەبي سانيتارييالىق اۆياتسييا بورتىمەن تايلاندتىڭ پحۋكەت قالاسىنان الماتىعا جەتكٸزٸلگەن.
سول كەزدە ونىڭ جاعدايى ٶتە اۋىر بولىپ, دەنە سالماعى تىم تٶمەن بولعان.
ەمدەۋ بارىسىندا ماماندار سەبيدٸڭ ٶمٸرٸنە قاۋٸپ تٶندٸرگەن اسقىنۋدى – ٸشەكتٸڭ جابىق پەرفوراتسيياسىن دەر كەزٸندە انىقتاعان. وسىعان بايلانىستى بالالار حيرۋرگتەرٸ شۇعىل كونسيليۋم ٶتكٸزٸپ, جەدەل وپەراتسييا جاساۋ تۋرالى شەشٸم قابىلداعان.
دەرٸگەرلەردٸڭ كەسٸبي ەرەكەتٸنٸڭ ارقاسىندا وتا سەتتٸ ٶتٸپ, نەرەستەنٸڭ ٶمٸرٸ ساقتالىپ قالدى.
ەكٸ ايلىق قارقىندى ەم مەن وڭالتۋدان كەيٸن سەبي اۋرۋحانادان شىعارىلىپ, اتا-اناسىنىڭ قولىنا تابىستالدى.
