مەملەكەت باسشىسى ۇلتتىق بانك ءتوراعاسى تيمۋر سۇلەيمەنوۆتى قابىلدادى، دەپ حابارلايدى Dalanews.kz.
پرەزيدەنتكە ەكونوميكا مەن قارجى جۇيەسىنىڭ جاي-كۇيى جانە بيىلعى قاڭتار-قاراشا ايلارىندا جۇرگىزىلگەن اقشا-نەسيە ساياساتىنىڭ نەگىزگى باعىتتارى جونىندە ەسەپ بەرىلىپ، 2026 جىلعا ارنالعان جوسپار تانىستىرىلدى.
تيمۋر سۇلەيمەنوۆ:
- ىسكەرلىك بەلسەندىلىك، ينفلياسياعا ىقپال ەتەتىن فاكتورلار جانە باعانى تۇراقتاندىرۋ ءۇشىن قابىلدانعان شارالار تۋرالى ايتتى.
ۇكىمەت، ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگى 2026-2028 جىلدارعا ارنالعان ماكروەكونوميكانى تۇراقتاندىرۋ جانە حالىقتىڭ ءال-اۋقاتىن ارتتىرۋ جونىندەگى بىرلەسكەن ءىس-قيمىل باعدارلاماسىن جۇزەگە اسىرۋعا كىرىستى.
قارجى، ۆاليۋتا جانە مەملەكەتتىك باعالى قاعازدار نارىقتارىنداعى جاعداي، ۇلتتىق قور مەن ءبىرىڭعاي زەينەتاقى جيناقتاۋشى قورى اكتيۆتەرىنىڭ، التىن-ۆاليۋتا رەزەرۆتەرىنىڭ جاي-كۇيى تۋرالى مالىمەت بەردى.
جىل باسىنان بەرى ۇلتتىق قوردىڭ ۆاليۋتالىق اكتيۆتەرى 4،8 ميلليارد دوللارعا ءوستى.
11 ايداعى ينۆەستيسيالىق تابىس شامامەن 8،2 ميلليارد دوللاردى نەمەسە 13،7 پايىزدى قۇرادى.
ەسەپتى كەزەڭدە التىن-ۆاليۋتا رەزەرۆتەرى 16،3 ميلليارد دوللارعا نەمەسە 36 پايىزعا ۇلعايىپ، 62،1 ميلليارد دوللارعا جەتتى.
بجزق زەينەتاقى اكتيۆتەرىنىڭ كولەمى بيىل قاڭتار-قاراشا ايلارىندا 2،6 تريلليون تەڭگەگە نەمەسە 11،7 پايىزعا ارتىپ، 25 تريلليون تەڭگە بولدى.
- جاپپاي سيفرلاندىرۋ بارىسى جانە ۇلتتىق بانكتىڭ سيفرلىق جوبالارى جونىندە باياندادى. سونىڭ ىشىندە انتيفرود ورتالىقتىڭ جۇمىسىنا، ۇلتتىق سيفرلىق قارجى ينفراقۇرىلىمدارىن تەحنولوگيالىق تۇرعىدان جۇزەگە اسىرۋعا ءمان بەرىلدى.
ۇلتتىق بانك باعا تۇراقتىلىعىن ساقتاپ، ينفلياسيانى ورتاشا 5 پايىزدىق مەجەدە ۇستاپ تۇرۋ ءۇشىن بارلىق قاجەتتى شارانى قابىلداۋدا.
پرەزيدەنت:
ينفلياسيانى تومەندەتۋگە، قارجى نارىعى مەن سيفرلىق ترانسفورماسيا سەكتورىنىڭ تۇراقتىلىعىن قامتاماسىز ەتۋگە باسا نازار اۋدارىپ، ۇلتتىق بانك قىزمەتىنە قاتىستى ءبىرقاتار تاپسىرما بەردى.
