قازاقستاندا دوللار باعامىنىڭ كٷرت قىمباتتاۋىنا نەگٸز جوق, دەپ حابارلايدى dalanews.kz.
بۇل تۋرالى مەجٸلٸس كۋلۋارىندا ۇلتتىق بانك تٶراعاسى تيمۋر سٷلەيمەنوۆ مەلٸمدەدٸ.
ونىڭ ايتۋىنشا, قارجى رەتتەۋشٸسٸ ۆاليۋتا باعامىنا بولجام جاسامايدى, الايدا قازٸرگٸ جاعدايدا دوللاردىڭ كٷرت ٶسۋٸنە الىپ كەلەتٸن نارىقتىق نەمەسە ٸرگەلٸ فاكتورلار بايقالماي وتىر.
«بٸز ۆاليۋتا باعامىنا بولجام جاسامايمىز, ٶيتكەنٸ مونەتارلىق رەتتەۋشٸ رەتٸندە مۇنداي قادام نارىققا دۇرىس سيگنال بولمايدى. دەگەنمەن دوللار باعامىنىڭ جازدا دا, كٷزدە دە كٷرت ٶسۋٸنە الىپ كەلەتٸن ٸرگەلٸ نەمەسە نارىقتىق العىشارتتاردى كٶرٸپ وتىرعان جوقپىز», – دەدٸ سٷلەيمەنوۆ.
ۇلتتىق بانك باسشىسى دوللار باعامىندا ماۋسىمدىق ٶزگەرٸستەردٸڭ بولاتىنىن ايتتى. ونىڭ سٶزٸنشە, جاز ايلارىندا حالىقتىڭ شەتەلگە دەمالىسقا شىعۋىنا بايلانىستى شەتەل ۆاليۋتاسىنا سۇرانىس دەستٷرلٸ تٷردە ارتادى.
«جاز مەزگٸلٸ – دەمالىس كەزەڭٸ. سوندىقتان دوللار باعامىندا دا ماۋسىمدىق ەرەكشەلٸك بار. ادامدار شەتەلگە شىعۋ ٷشٸن ۆاليۋتا ساتىپ الادى. سونىمەن قاتار ٸرٸ كومپانييالار قۇرىلىس ماۋسىمىندا ٷلگەرۋ ٷشٸن شەتەلدٸك جابدىقتار مەن تەحنيكانى ساتىپ الادى. سول سەبەپتٸ جازدا جەنە كٷزدە دوللارعا سۇرانىس ەردايىم جوعارى بولادى. ەدەتتە جىلدىڭ باسىندا باعام سەل تٶمەندەپ, كەيٸن جىل ورتاسى مەن سوڭىنا قاراي بٸرشاما كٶتەرٸلەدٸ», – دەپ تٷسٸندٸردٸ ول.
سٷلەيمەنوۆتٸڭ ايتۋىنشا, مۇنداي ٷردٸس 2026 جىلى دا ساقتالادى دەپ كٷتٸلۋدە. الايدا ۇلتتىق بانك ۆاليۋتا نارىعىندا كٷرت اۋىتقۋلار بولادى دەپ بولجام جاساپ وتىرعان جوق.
