Qazaqstanda dollar baǵamynyń kúrt qymbattaýyna negiz joq, dep habarlaidy dalanews.kz.
Bul týraly Májilis kýlýarynda Ulttyq bank tóraǵasy Timýr Súleimenov málimdedi.
Onyń aitýynsha, qarjy retteýshisi valiýta baǵamyna boljam jasamaidy, alaida qazirgi jaǵdaida dollardyń kúrt ósýine alyp keletin naryqtyq nemese irgeli faktorlar baiqalmai otyr.
«Biz valiýta baǵamyna boljam jasamaimyz, óitkeni monetarlyq retteýshi retinde mundai qadam naryqqa durys signal bolmaidy. Degenmen dollar baǵamynyń jazda da, kúzde de kúrt ósýine alyp keletin irgeli nemese naryqtyq alǵysharttardy kórip otyrǵan joqpyz», – dedi Súleimenov.
Ulttyq bank basshysy dollar baǵamynda maýsymdyq ózgeristerdiń bolatynyn aitty. Onyń sózinshe, jaz ailarynda halyqtyń shetelge demalysqa shyǵýyna bailanysty shetel valiýtasyna suranys dástúrli túrde artady.
«Jaz mezgili – demalys kezeńi. Sondyqtan dollar baǵamynda da maýsymdyq erekshelik bar. Adamdar shetelge shyǵý úshin valiýta satyp alady. Sonymen qatar iri kompaniialar qurylys maýsymynda úlgerý úshin sheteldik jabdyqtar men tehnikany satyp alady. Sol sebepti jazda jáne kúzde dollarǵa suranys árdaiym joǵary bolady. Ádette jyldyń basynda baǵam sál tómendep, keiin jyl ortasy men sońyna qarai birshama kóteriledi», – dep túsindirdi ol.
Súleimenovtiń aitýynsha, mundai úrdis 2026 jyly da saqtalady dep kútilýde. Alaida Ulttyq bank valiýta naryǵynda kúrt aýytqýlar bolady dep boljam jasap otyrǵan joq.
