سولتۇستىك قازاقستان وبلىسىندا توتەنشە جاعدايلار ءمينيسترى شىڭعىس ءارىنوۆ پەن ءوڭىر باسشىسى عاۋەز نۇرمۇحامبەتوۆتىڭ قاتىسۋىمەن قۇتقارۋ جانە ىزدەۋ شارالارىنا ارنالعان العاشقى امبەباپ كەشەننىڭ اشىلۋى ءوتتى،- دەپ حابارلايدى Dalanews.kz
جاڭا نىسان پەستروە كولى جانە تەپليچنوە اۋىلىنىڭ ماڭىندا ورنالاسقان.
ايتا كەتۋ كەرەك، بۇرىن جەدەل-قۇتقارۋ جاساعىندا ءوزىنىڭ عيماراتى بولماعان. جاڭا كەشەن ازاماتتاردىڭ قاۋىپسىزدىگىن قامتاماسىز ەتۋدە ماڭىزدى ءرول اتقارىپ، قۇتقارۋشىلارعا اپاتتىق جاعداي كەزىندە جەدەل ارەكەت ەتۋگە مۇمكىندىك بەرەدى. كەشەن زاماناۋي جابدىقتار مەن تەحنيكامەن جابدىقتالعان. مىسالى، اۆتوكولىكتىڭ ەسىگىن اشۋعا "تاران"، جول-كولىك وقيعالارىندا مەتالل كەسۋ جانە كەڭەيتۋگە ارنايى قۇرال ساتىپ الىنعان. كەشەندە سۇڭگۋىرلەر مەن قايىقتار، يتتەرمەن كينولوگتار دا بار.
"تاسقىندا جەدەل-قۇتقارۋ جاساعى ادامداردى قۇتقارۋ بويىنشا ماڭىزدى ميسسيانى اتقارادى. ەندى توتەنشە وقيعالارعا دايىندىق دەڭگەيى ايتارلىقتاي ءوسىپ، ارەكەت ەتۋ ۋاقىتى قىسقارادى جانە كومەك كورسەتۋ ساپاسى جاقسارادى"، - دەدى عاۋەز نۇرمۇحامبەتوۆ.
ەسكە سالايىق، بۇعان دەيىن سقو-دا سۋ تاسقىنى ءقاۋپى بار ايماقتار دروندارمەن باقىلاناتىنىن جازعان بولاتىنبىز. سولتۇستىك ءوڭىر سۋ تاسۋ ءقاۋپى جوعارى ايماققا جاتادى. سونداي-اق «قىزىل» ايماقتا اباي وبلىسى مەن شىعىس ءوڭىرى بار.
