ازاپتاۋ ءىسى بويىنشا كۇدىككە ىلىنگەن سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ بۇرىنعى باسشىسى تالعات تاتۋبايەۆ ەكى ايعا قاماۋعا الىندى، دەپ حابارلايدى Dalanews.kz KazTAG اگەنتتىگىنە سىلتەمە جاساپ.
“14 شىلدەدە تاتۋبايەۆ تەرگەۋ امالدارى اياقتالعانعا دەيىن ەكى ايعا قاماۋعا الىندى. سونداي-اق وسى ءىس اياسىندا “قورعاس ءىسى” بويىنشا تەرگەۋشى بولعان باۋىرجان مۇجىقوۆ تا ءدال وسى مەرزىمگە قاماۋعا الىندى”، – دەدى دۇيسەنبى كۇنى اگەنتتىككە مالىمەت بەرگەن دەرەككوز.
KazTAG رەداكسياسى بۇل جايتقا بايلانىستى باس پروكۋراتۋرانىڭ باسپا ءسوز قىزمەتىنە رەسمي تۇسىنىكتەمە الۋ ءۇشىن سۇرانىس جولداعان.
ايتا كەتەيىك، تالعات تاتۋبايەۆ بۇعان دەيىن دە ازاپتاۋ دەرەگى بويىنشا ۇستالعان ەدى. ول – بۇرىنعى باس پروكۋرور ءارى ەكونوميكالىق جانە سىبايلاس جەمقورلىق قىلمىستارىمەن كۇرەس اگەنتتىگىنىڭ (قارجى پوليسياسى) ەكس-باسشىسى قايرات قوجامجاروۆتىڭ ەڭ سەنىمدى سەرىكتەرىنىڭ ءبىرى سانالادى.
12 شىلدە كۇنى KazTAG اگەنتتىگى قوجامجاروۆپەن بايلانىستى تۇلعالار تاتۋبايەۆ پەن وزگە دە توپ مۇشەلەرىن “قۇتقارۋعا” تىرىسىپ جاتقانى، ولار جازادان سىتىلىپ كەتۋى مۇمكىن ەكەنى تۋرالى حابارلاعان.
