Azaptaý isi boiynsha kúdikke ilingen Sybailas jemqorlyqqa qarsy is-qimyl ulttyq biýrosynyń burynǵy basshysy Talǵat Tatýbaev eki aiǵa qamaýǵa alyndy, dep habarlaidy Dalanews.kz KazTAG agenttigine silteme jasap.
“14 shildede Tatýbaev tergeý amaldary aiaqtalǵanǵa deiin eki aiǵa qamaýǵa alyndy. Sondai-aq osy is aiasynda “Qorǵas isi” boiynsha tergeýshi bolǵan Baýyrjan Mujyqov ta dál osy merzimge qamaýǵa alyndy”, – dedi dúisenbi kúni agenttikke málimet bergen derekkóz.
KazTAG redaktsiiasy bul jaitqa bailanysty Bas prokýratýranyń baspasóz qyzmetine resmi túsinikteme alý úshin suranys joldaǵan.
Aita keteiik, Talǵat Tatýbaev buǵan deiin de azaptaý deregi boiynsha ustalǵan edi. Ol – burynǵy bas prokýror ári Ekonomikalyq jáne sybailas jemqorlyq qylmystarymen kúres agenttiginiń (qarjy politsiiasy) eks-basshysy Qairat Qojamjarovtyń eń senimdi serikteriniń biri sanalady.
12 shilde kúni KazTAG agenttigi Qojamjarovpen bailanysty tulǵalar Tatýbaev pen ózge de top múshelerin “qutqarýǵa” tyrysyp jatqany, olar jazadan sytylyp ketýi múmkin ekeni týraly habarlaǵan.
