شىعىس قازاقستان وبلىسىندا باعانى تۇراقتاندىرۋ ماقساتىندا «ەرتىس» الەۋمەتتىك-كاسىپكەرلىك كورپوراسياسى كاسىپكەرلىك سۋبەكتىلەرىمەن ءونىم جەتكىزۋ بويىنشا زايم شارتتارىن جاساستى. سونىمەن قاتار، 2025–2026 جىلدارداعى ماۋسىمارالىق كەزەڭگە كارتوپ، ءسابىز، پياز جانە قىرىققاباتتى قامتيتىن 7 مىڭ توننا كوكونىس ونىمىنە كەلىسىمشارتتار جاسالدى،- دەپ حابارلايدى Dalanews.kz
شقو-داعى الەۋمەتتىك ساۋدا نۇكتەلەرىندە الەۋمەتتىك ماڭىزى بار ازىق-تۇلىك تاۋارلارىنىڭ (ءامات) توعىز ءتۇرى ساتىلىمعا شىعارىلعان. اتاپ ايتقاندا: كارتوپ – 263 تگ/كگ، ءسابىز – 288 تگ/كگ، پياز – 228 تگ/كگ، قىرىققابات – 263 تگ/كگ، كۇرىش – 432 تگ/كگ، قاراقۇمىق جارماسى – 181 تگ/كگ، كۇنباعىس مايى – 720 تگ/كگ، قانت – 417 تگ/كگ، روجكي – 305 تگ/كگ.
2025–2026 جىلدارداعى ماۋسىمارالىق كەزەڭگە كارتوپ – 2000 توننا، ءسابىز – 900 توننا، پياز – 600 توننا، قىرىققابات – 900 توننا كولەمىندە كەلىسىمشارتتار جاسالدى.
ءامات باعاسى بويىنشا ستاتيستيكالىق دەرەكتەردىڭ نەعۇرلىم شىنايى كورسەتىلۋى ءۇشىن ستاتيستيكا دەپارتامەنتى زەرتتەيتىن ساۋدا نىساندارى تىزىمىنە تۇراقتاندىرۋ قورى ارقىلى ءونىم تاراتىلاتىن ساۋدا ورىندارىن ەنگىزۋ ۇسىنىلدى.
كەلىسىمشارتتاردىڭ كەش جاسالۋىنا بايلانىستى بيىل ءامات ساتىلىمى 22 مامىردا عانا باستالدى. ال كوكتەم-جاز ماۋسىمىنداعى تۇراقتاندىرۋ كەزەڭى 1 مامىر مەن 31 شىلدە ارالىعىندا بەلگىلەنگەن بولاتىن.
«اتالعان مەحانيزمدى ىسكە اسىرىپ، 2026 جىلعى كوكتەم-جاز كەزەڭىنە كەلىسىمشارتتاردى 2025 جىلعى تامىز ايىندا، ال 2026–2027 جىلدارداعى كۇز-قىس كەزەڭىنە كەلىسىمشارتتاردى 2025 جىلعى قىركۇيەكتە جاساسۋ قاجەت»، – دەپ تاپسىردى وبلىس اكىمى نۇرىمبەت ساقتاعانوۆ.
سونداي-اق، اۋىل شارۋاشىلىعى تاۋارىن وندىرۋشىلەرمەن، اسىرەسە «التاي» كوتەرمە-رەتتەۋ ورتالىعى ارقىلى فورۆاردتىق كەلىسىمشارتتار جاساۋ ماسەلەسىن پىسىقتاۋ قاجەتتىگى ايتىلدى.
قازىرگى تاڭدا 1000 كوتەرمە جەتكىزۋشىمەن، اۋىل شارۋاشىلىعى تاۋار وندىرۋشىلەرىمەن جانە ساۋدا ورىندارىمەن 7%-دىق ەڭ تومەنگى ساۋدا ۇستەمەسىن قولدانۋ تۋرالى مەموراندۋمدار جاسالعان. وبلىس اۋماعىندا نەگىزگى تاۋارلار ەڭ تومەنگى ساۋدا ۇستەمەسىمەن ساتىلاتىن 227 الەۋمەتتىك بۇرىش جۇمىس ىستەيدى.
جەرگىلىكتى اۋىل شارۋاشىلىعى وندىرۋشىلەرىنە ونىمدەرىن ۇستەمەسىز ساتۋعا ارنالعان 263 جەڭىلدىكتى ساۋدا ورنى تۇراقتى تۇردە ۇسىنىلادى. ونىمدەردى ساۋدا ۇستەمەسىنسىز ساتۋ ءۇشىن وبلىس كولەمىندە تۇراقتى تۇردە اۋىل شارۋاشىلىعى جارمەڭكەلەرى وتكىزىلەدى. جىل باسىنان بەرى شقو-دا 160 اۋىل شارۋاشىلىعى جارمەڭكەسى وتكىزىلدى.
ازىق-تۇلىك تاپشىلىعىن بولدىرماۋ ماقساتىندا وبلىستاعى قالالار مەن اۋدانداردىڭ اكىمدىكتەرى ساۋدا ورتالىقتارى مەن دۇكەندەردە الەۋمەتتىك ماڭىزى بار ازىق-تۇلىك تاۋارلارىنىڭ قورى مەن باعاسىنا تۇراقتى تۇردە مونيتورينگ جۇرگىزۋدە.
