بيىل شقو-دا «ەرتىس» اكك مەن جەكە ينۆەستورلاردىڭ ارقاسىندا تۇرعىن ۇيلەر قۇرىلىسىنىڭ قارقىنى ايتارلىقتاي ارتادى. قۇرىلىستىڭ ساپاسىن باقىلاۋ ماقساتىندا ءار ناقتى وبەكت ءۇشىن ارنايى الگوريتم جاسالادى، وندا ناقتى ارەكەتتەر تىزبەگى كورسەتىلەدى. ينۆەستورلارعا قاجەتتى ينجەنەرلىك ينفراقۇرىلىم جەلىسىمەن قاتار، ساراپتامادان وتكەن دايىن جوبالاردىڭ بولۋى دا مۇمكىندىك بەرىپ وتىر.
باسقارماسى باسشىسى اسەت سۇلەيمەنوۆتىڭ ايتۋىنشا، اعىمداعى جىلى قارجىلاندىرۋدىڭ بارلىق كوزدەرى ەسەبىنەن بارلىعى 1 052 مىڭ م2 تۇرعىن ءۇي نەمەسە 10 936 پاتەر قۇرىلىسى باستالادى. بۇل كورسەتكىشتىڭ بيىل 647 مىڭ شارشى مەترى، ياعني، وتكەن جىلعى كولەمگە 125% وسىممەن 6 404 پاتەر ىسكە قوسىلادى.
– ونىڭ ىشىندە بيىل 141،5 مىڭ م2 19 كوممەرسيالىق ءۇيدىڭ نەمەسە جالپى سوماسى 26،0 ملرد تەڭگەگە 1 443 پاتەردىڭ قۇرىلىسىن باستاۋ جوسپارلانۋدا. سونداي-اق، «ەرتىس «اكك» اق-مەن بىرلەسىپ جەكە ينۆەستيسيالار ەسەبىنەن كوممەرسيالىق تۇرعىن ءۇي سالۋ تەتىگى ازىرلەندى. ول ءۇشىن جەكە ينۆەستورلارعا جەر ۋچاسكەلەرى جانە تۇرعىن ۇيلەردىڭ ازىرلەنگەن جوبالاۋ-سمەتالىق قۇجاتتاماسى بەرىلەدى، بۇل ءۇي قۇرىلىسىنىڭ باستالۋىن بىرنەشە ەسە جەدەلدەتىپ، رۇقسات بەرۋ قۇجاتتارىن الۋ مەرزىمدەرىن قىسقارتادى، – دەدى قۇرىلىس، ساۋلەت جانە قالا قۇرىلىسى باسقارماسىنىڭ باسشىسى اسەت سۇلەيمەنوۆ.
شىعىس قازاقستان وبلىسىنىڭ اكىمى «ءبىرقاباتتى شىعىس» وڭىرلىك باعدارلاماسىنىڭ تيىمدىلىگىن اتاپ ءوتتى، سونداي-اق وبلىس اۋداندارىنا قۇرىلىسقا قاجەتتى قوسىمشا قاراجات ءبولۋ باعىتتارىنا توقتالدى.
– وتكەن جىلى «ءبىرقاباتتى شىعىس» وڭىرلىك باعدارلاماسى ءوزىنىڭ تيىمدىلىگىن كورسەتتى. ءبىز 36 مىڭ م2 سالدىق، بيىل تاعى 60 مىڭ سالۋىمىز كەرەك. ورىنباسارلارىم الماسحان سماتلايەۆ پەن باقىتجان باياحمەتوۆكە قالا جانە اۋدان اكىمدەرىمەن قۇرىلىس قارقىنىن ارتتىرۋ باعىتىندا جۇمىس جۇرگىزۋدى تاپسىرامىن. كەلەسى جىلدان باستاپ "بەلسەندى اكىم – بەلسەندى قارجىلاندىرۋ" قاعيداتى بولادى، مۇنداي جاعدايدا نەسيەلىك تۇرعىن ۇيلەردى جۇزەگە اسىرعان اۋدان جالعا بەرىلەتىن تۇرعىن ءۇي قۇرىلىسىنا كوبىرەك قاراجات الۋى ءتيىس، – دەپ حابارلادى شقو اكىمى دانيال احمەتوۆ.
اعىمداعى جىلى بيۋدجەت قاراجاتى ەسەبىنەن 35 كوپپاتەرلى ءۇيدى پايدالانۋعا بەرۋ جوسپارلانىپ وتىر، ولار ماگيسترالدىق جانە قاجەتتى ينفراقۇرىلىمدىق جەلىلەرمەن تولىق قامتاماسىز ەتىلگەن.
