تۇركىستان قالاسىنا اۋدان، قالالاردان جينالعان پەداگوگتار تاجىريبە جيناقتاۋ ماقساتىندا تۇركىستان قالاسىندا ورنالاسقان ءبىلىم وردالارىندا، قوسىمشا ءبىلىم بەرۋ، سپورت نىساندارىندا بولدى. «Farab» كىتاپحاناسىندا، وقۋشىلار سارايى مەن تەننيس ورتالىعى مەن ەسكەك ەسۋ كانالىنا جانە «نازاربايەۆ زياتكەرلىك مەكتەبىن» ارالاپ، ونداعى جاڭاشىلدىققا كۋا بولدى. ەرەكشە فورماتتا باستالعان تامىز كەڭەسى اياسىندا ارنايى كورمە ۇيىمداستىرىلدى.
جارتى ميلليونعا جۋىق كىتاپ قورى بار «Farab» كىتاپحاناسىنداعى زاماناۋي تەحنيكامەن جابدىقتالعان «Fablab» شەبەرحاناسى جەلىسىن كەنتاۋ، ارىس جانە لەنگىر قالالارىندا اشۋ كوزدەلگەن. بۇل – مەكتەپتەگى ەڭبەك ءپانىنىڭ جاڭا ۇلگىسىن كورسەتەتىن شىعارماشىلىق ورتالىق.
ءوڭىردىڭ 17 اۋدان، قالاسىندا تىرەك مەكتەپتەر جاساقتالاتىن بولادى. جوبا اياسىندا نزم مەكتەپتەرىنىڭ الەۋەتىن 17 تىرەك مەكتەبىنە ەنگىزىپ، وقۋ-ادىستەمەلىك سۇيەمەلدەۋ جۇرگىزىلەدى. وسى جوبا اياسىندا پەداگوگتەردىڭ ساپالىق قۇرامى مەن مەكتەپتەردىڭ ماتەريالدىق مۇمكىندىگى جاقسارادى دەپ كۇتىلۋدە. نزم تاجىريبەسىن تاراتۋدا ماڭىزى باستامالار قولعا الىنادى.
سونداي-اق، وبلىس اكىمى ءومىرزاق شوكەيەۆ مۇعالىمدەرمەن بىرگە شاھارداعى سپورت نىساندارىندا بولدى. جاس ۇرپاقتى تاربيەلەۋدەگى باستى ماقساتتىڭ ءبىرى – سپورتقا باۋلۋ ەكەنىن ايتقان ءوڭىر باسشىسى، بالالار ءبىلىمدى ءارى دەنى ساۋ بولىپ ءوسۋى ءۇشىن جان-جاقتى دامۋى كەرەك ەكەنىن جەتكىزدى.
– وزدەرىڭىز جاڭا كورگەن «Farab» كىتاپحاناسىن سالۋدا الەمنىڭ دامىعان ەلدەرىنىڭ وزىق ۇلگىلەرىن قولداندىق. مۇندا جاستار تەك كىتاپ وقىپ قانا قويماي، شىعارماشىلىقپەن اينالىسادى. ىزدەنەدى. «Fablab» شەبەرحاناسىندا وقۋشىلار ءوز قولدارىمەن روبوتار، ءتۇرلى دۇنيەلەردى جاساپ شىعارادى. وسىنداي شەبەرحانالاردى بارلىق اۋدان، قالادا اشۋدى جوسپارلاپ وتىرمىز. كىتاپحانادا تۇركىستاننىڭ تاريحىمەن تانىسۋعا مۇمكىندىك بار.
تۇركىستاننىڭ ءبىرىنشى قۇندىلىعى – قوجا احمەت ياساۋي. ونىڭ تاريحي تۇلعاسى مەن ءىلىمى. يسلامداعى ورنى. جالپى قازاقتىڭ تاريحىندا ءياساۋيدىڭ ورنى ەرەكشە. مەملەكەتتىلىكتىڭ دامۋىنا ءوز ءىزىن قالدىرعان. وزدەرىڭىز سەكىلدى ۇستاز بولعان تاريحي تۇلعانى حالىق ايرىقشا جاقسى كورگەن.
ەكىنشى قۇندىلىق – قوجا احمەت ياساۋي كەسەنەسى. بۇل كەسەنە – ساۋلەت ونەرىنىڭ جاۋھارى. بۇعان تەڭدەس ماۆزولەي الەمدە جوق دەۋگە بولادى. ءاربىر كىرپىشى ەسەپپەن قالانعان. وكىنىشكە قاراي، ءبىز ءياساۋيدىڭ بولمىسىن، ونىڭ رۋحاني بايلىعىن ءالى تولىق بىلمەيمىز. تەرەڭ زەرتتەلمەگەن. سوندىقتان ءبىز 27 قازاندا تۇركىستاندا حالىقارالىق عىلىمي كونفەرەنسيا وتكىزەمىز. وندا ءياساۋيدىڭ مۇراسى مەن تۇلعاسى جانە كەسەنەسى تۋرالى تىڭ دەرەكتەر ايتىلادى. زەرتتەلەدى. شەتەلدەن تاريحشىلار كەلەدى. بارشاڭىزدى سول ءىس-شاراعا شاقىرامىز، – دەگەن ءومىرزاق شوكەيەۆ سپورت نىساندارىنىڭ دا ماڭىزىن اتاپ ءوتتى.
تۇركىستاندا سپورت سالاسىنا قولداۋ كورسەتىلىپ جاتقانىن جەتكىزدى.
تۇركىستان وبلىسىندا ءبىلىم سالاسىن دامىتۋعا ءجىتى كوڭىل ءبولىنىپ كەلەدى. ۇلتتىق ءبىرىڭعاي تەستىلەۋ ناتيجەسى بويىنشا رەسپۋبليكا كولەمىندە «100 ۇزدىك مەكتەپ» تىزىمىنە تۇركىستان وبلىسىنىڭ 11 مەكتەبى ەنگەن. بۇل – ۇلكەن جەتىستىك. تۇركىستان وبلىسىنىڭ 961 ورتا ءبىلىم بەرۋ ۇيىمىندا 510 مىڭنان اسا وقۋشى ءبىلىم الادى. بۇل ەلىمىزدەگى ەڭ ۇلكەن كورسەتكىش، ءاربىر 7ء-شى بالا تۇركىستان وبلىسىندا ءبىلىم الادى دەگەن ءسوز. قازاقستان بويىنشا قۇرىلىمى ءجۇرىپ جاتقان 200 مەكتەپتىڭ 47ء-سى تۇركىستان وبلىسىنىڭ ەنشىسىندە. رەسپۋبليكادا بالا-باقشا اشۋ كورسەتكىشى بويىنشا دا تۇركىستان وبلىسى الدىڭعى ورىندا.
جاڭا وقۋ جىلىندا «كيبەرنەت اكادەمياسىمەن» بىرگە تۇركىستان مەن كەنتاۋ قالالارىندا پەداگوگتەردىڭ IT قۇزىرەتتىلىگى مەن ماتەماتيكالىق بىلىكتىگىن دامىتۋعا باعىتتالعان «ماتەماتيكاعا دايىندىقتىڭ جاڭا تەحنولوگياسى» باعدارلاماسىن ەنگىزۋ جوسپارلانىپ وتىر. بۇل باعدارلامادا مۇعالىمدەر رفمم، قازاق-بريتان تەحنولوگيالىق ۋنيۆەرسيتەتىنىڭ الەۋەتىن پايدالاناتىن بولادى.
وبلىس بويىنشا 2025 جىلعا دەيىن «وقۋعا قۇشتار مەكتەپ» جوباسى اياسىندا 324 مەكتەپتىڭ كىتاپحانالارىن جاڭعىرتۋ جوسپارلانعان.
تەحنيكالىق جانە كاسىپتىك ءبىلىم بەرۋ سالاسىن دامىتۋ ماقساتىندا كوللەدجدەرگە ارنايى تالاپتار قويىپ وتىرمىز. كوللەدج باسشىلارىنىڭ جۇمىستارىن باعالايتىن كرى جۇيەسى ەنگىزىلەدى، ونىڭ ىشىندە ءوندىرىس ورىندارىمەن بىرلەسە وتىرىپ كىشى كاسىپورىندار قۇرۋ، بيزنەس-ينكۋباتورلار اشۋ ماسەلەسى، پەداگوگتاردىڭ ساپالىق قۇرامىن ارتتىرۋ، تۇلەكتەردىڭ جۇمىسقا ورنالاسۋ كورسەتكىشتەرىن جوعارىلاتۋ شارالارى قامتىلاتىن بولادى.
