كەزدەسۋدە قازاق بوكسىنىڭ دامۋ بارىسى، تۇركىستان ءوڭىرىنىڭ جاستارىن بوكسقا باۋلىپ، چەمپيوندار شوعىرىن شىعارۋ ماسەلەلەرى ءسوز بولدى. ءوڭىر باسشىسى باپكەر مەن سپورتشىنىڭ جەتىستىگىن جوعارى باعالاپ، وبلىستا سپورتتى دامىتۋعا جاعداي جاسالىپ جاتقانىن، ودان دا جاقسى دامىتۋ ءۇشىن ۇسىنىس-پىكىرلەرىن تىڭداۋعا دايىن ەكەنىن جەتكىزدى.
وليمپيادا ويىندارىنىڭ 2 قولا جۇلدەگەرى مەن ءۇش الەم چەمپيونىن دايارلاعان داڭقتى باپكەر مىرزاعالي ايتجانوۆ تۇركىستان وبلىسىندا بوكستىڭ دامۋ دەڭگەيى جاقسى ەكەنىن، قولداۋ كۇشەيتىلسە، ءالى دە تالانتتار شىعاتىنىن اتاپ ءوتتى.
سونىمەن بىرگە بيىلعى الەم چەمپيوناتى ەرەكشە وتكەنىن، تۇڭعىش رەت جەڭىمپازعا ارنايى بەلبەۋ مەن اقشالاي سىياقى بەرىلگەنىن، ساكەننىڭ جەڭىسى ارقىلى جاسوسپىرىمدەردىڭ بوكسقا قىزىعۋشىلىعى ارتا تۇسكەنىن جەتكىزدى. سپورتقا جاناشىرلىق تانىتقان ءوڭىر باسشىسىنا ريزاشىلىعىن ءبىلدىردى.
كەزدەسۋ بارىسىندا سپورتشىلاردى جان-جاقتى ءارى كاسىبي تۇرعىدا دامىتۋ ءۇشىن تۇركىستاندا بوكس كلۋبىن قۇرۋ ماسەلەسى ءسوز بولدى. جاڭادان قۇرىلاتىن بوكس كلۋبى «تۇران» دەپ اتالماق.
ءومىرزاق شوكەيەۆ تۇركىستان وبلىسىندا سپورتتى دامىتۋعا جاعداي جاسالىپ، سپورت نىساندارى سالىنىپ جاتقانىنا توقتالدى.
– تۇركىستاندا حالىقارالىق تالاپقا ساي سپورت كەشەندەرى اشىلدى. ءبىرقاتارىنىڭ قۇرىلىسى ءجۇرىپ جاتىر. بەكزات ساتتارحانوۆ اتىنداعى سپورت كەشەنى دە سالىنۋدا. ءبىز سپورتتىڭ بارلىق ءتۇرىن دامىتامىز. ونىڭ ىشىندە بوكستىڭ ورنى ەرەكشە. ەلىمىزدەگى №1 سپورت دەۋگە بولادى. تولىق قولدايمىز. «تۇران» بوكس كلۋبى جاساقتالىپ، وعان ءتيىستى كومەك بەرىلەدى. كاسىپكەرلەر مەن دەمەۋشىلەر دە بۇل باستاماعا ۇلەس قوسادى دەپ ويلايمىن، – دەگەن ءوڭىر باسشىسى بىلىكتى باپكەر مەن شاكىرتىنە تۇركىستاندا جان-جاقتى قولداۋ كورسەتىلەتىنىن جەتكىزدى.
