Shókeev «Turan» boks klýby qurylatynyn aitty
Kezdesýde qazaq boksynyń damý barysy, Túrkistan óńiriniń jastaryn boksqa baýlyp, chempiondar shoǵyryn shyǵarý máseleleri sóz boldy. Óńir basshysy bapker men sportshynyń jetistigin joǵary baǵalap, oblysta sportty damytýǵa jaǵdai jasalyp jatqanyn, odan da jaqsy damytý úshin usynys-pikirlerin tyńdaýǵa daiyn ekenin jetkizdi.
Olimpiada oiyndarynyń 2 qola júldegeri men úsh álem chempionyn daiarlaǵan dańqty bapker Myrzaǵali Aitjanov Túrkistan oblysynda bokstyń damý deńgeii jaqsy ekenin, qoldaý kúsheitilse, áli de talanttar shyǵatynyn atap ótti.
Sonymen birge biylǵy álem chempionaty erekshe ótkenin, tuńǵysh ret jeńimpazǵa arnaiy belbeý men aqshalai syiaqy berilgenin, Sákenniń jeńisi arqyly jasóspirimderdiń boksqa qyzyǵýshylyǵy arta túskenin jetkizdi. Sportqa janashyrlyq tanytqan óńir basshysyna rizashylyǵyn bildirdi.
Kezdesý barysynda sportshylardy jan-jaqty ári kásibi turǵyda damytý úshin Túrkistanda boks klýbyn qurý máselesi sóz boldy. Jańadan qurylatyn boks klýby «Turan» dep atalmaq.
Ómirzaq Shókeev Túrkistan oblysynda sportty damytýǵa jaǵdai jasalyp, sport nysandary salynyp jatqanyna toqtaldy.
– Túrkistanda halyqaralyq talapqa sai sport keshenderi ashyldy. Birqatarynyń qurylysy júrip jatyr. Bekzat Sattarhanov atyndaǵy sport kesheni de salynýda. Biz sporttyń barlyq túrin damytamyz. Onyń ishinde bokstyń orny erekshe. Elimizdegi №1 sport deýge bolady. Tolyq qoldaimyz. «Turan» boks klýby jasaqtalyp, oǵan tiisti kómek beriledi. Kásipkerler men demeýshiler de bul bastamaǵa úles qosady dep oilaimyn, – degen óńir basshysy bilikti bapker men shákirtine Túrkistanda jan-jaqty qoldaý kórsetiletinin jetkizdi.
