قالادا پاندەميانى اۋىزدىقتاۋ ماقساتىندا جەدەل شتاب قۇرىلعان بولاتىن. اتالعان ۇيىمنىڭ اتقارعان ىستەرى بويىنشا قالا اكىمىنىڭ ءبىرىنشى ورىنباسارى شىڭعىس مۇقان ەسەپ بەرىپ، ىندەتكە بايلانىستى قالىپتاسىپ وتىرعان جاعداي كۇردەلى ەكەنىن ايتتى.
جاھان ەلدەرىنىڭ بارلىعىندا ىندەت تارالۋى قارقىن العان. ءازىردىڭ وزىندە قازاقستاندا 10 ءوڭىر ىندەت جۇقتىرعانداردىڭ كورسەتكىشى بويىنشا قىزىل ايماققا وتكەن.
وسى كۇنگە دەيىن ەلىمىزدە COVID-19 دەرتىمەن اۋىرعان 448 مىڭ ادام انىقتالسا، ونىڭ 408 مىڭنان استامى جازىلىپ شىققان.
شىمكەنت قالاسىندا جىل باسىنان بەرى كوروناۆيرۋس ينفەكسياسىمەن اۋىرعان 8931 ادام تىركەلگەن، ونىڭ ىشىندە 7448ء-ى اۋرۋدان ايىعىپ شىققان.
"ءدال ءقازىر 1083 ادام ستاسيونارلاردا ەم قابىلداپ جاتىر. سوڭعى ءبىر تاۋلىكتە 126 ناۋقاس اۋرۋحاناعا تۇسكەن. وسىنى ەسكەرىپ، #2 قالالىق اۋرۋحانا ۋاقىتشا ينفەكسيالىق اۋرۋحاناعا اينالدىرىلدى. كوپشىلىك ورىندارعا بارماڭىزدار. ساقتانىپ جۇرىڭىزدەر. قالادا كوۆيدتىڭ دەلتا شتامى كەزىپ ءجۇر"، – دەپ جازدى وسى ورايدا شىڭعىس مۇقان الەمجەلىدەگى پاراقشاسىندا.
قالادا 45 ۆاكسينا ەگۋ بەكەتتەرى اشىلىپ، ۆاكسينانىڭ ءى كومپونەنتىن 303364 ادام السا، بۇل تۇرعىنداردىڭ ۆاكسينا الاتىن كونتينگەنتىنىڭ 56 پايىزىن قۇرايدى. ۆاكسينانىڭ ءىى كومپونەنتى 183651 ادامعا ەگىلسە، بۇل كورسەتكىش بەلگىلەنگەن كونتينگەنتتىڭ 30 پايىزى بولىپ وتىر.
ەپيدەميولوگيالىق احۋالدىڭ قالىپتاسۋ ديناميكاسىن ءجىتى تالداعان قالا اكىمى مۇرات ايتەنوۆ، ىندەت شارىقتاۋ شەگىنە جاقىنداپ قالعاندىعىنا نازار اۋداردى.
مەديسينالىق ۇيىمدار مەن سالا جەتەكشىلەرى باقىلاۋدى كۇشەيتىپ، بەلگىلەنگەن الگوريتم بويىنشا جەدەل ءىس-قيمىل جاساۋعا كوشۋ كەرەكتىگىن ايتتى.
جاۋاپتى تۇلعالار مەن مەديسينالىق ۇيىمدار جەتەكشىلەرىنىڭ حابارلامالارىن تىڭداعان قالا باسشىسى، سوڭعى تاۋلىكتەردە تىركەلگەن اۋرۋدىڭ كۇرت وسىمىنە بايلانىستى، قالانىڭ مەديسينالىق ۇيىمدارىندا رەانيماسيالىق توسەك ورىندار سانىن ەكى ەسە ۇلعايتۋ جونىندە تاپسىرما بەردى.
سالا جەتەكشىلەرىنە جەدەل جاردەم بريگادالارىنىڭ جۇمىسىن اۋماقتارعا ءبولىپ، بەكىتۋ ارقىلى تۇرعىنداردان تۇسكەن شاقىرتۋلارعا تەز جەتۋىن ۇيىمداستىرۋدى باقىلاۋدا ۇستاۋدى تاپسىردى. قالا بويىنشا ءموبيلدى جانە مونيتورينگتىك توپتار سانىن كوبەيتۋ كەرەكتىگىن ايتىپ، كارانتين تالاپتارىن ورەسكەل بۇزىپ، حالىقتىڭ كوپتەپ شوعىرلانۋىنا جول بەرگەن كاسىپكەرلىك سۋبەكتىلەرىنە قاتىستى جاۋاپكەرشىلىك شارالارىن قاتايتۋ ماسەلەسىن قاراستىرۋدى تاپسىردى.
جيىن بارىسىندا كاسىپكەرلىك سۋبەكتىلەرىنىڭ «Ashyq» جوباسىنا قاتىسۋ كورسەتكىشى تومەن ەكەندىگى نازارعا الىندى.
قالا بويىنشا وسى جوباعا بۇگىنگى كۇنگە دەيىن 764 بيزنەس سۋبەكتىلەرى عانا قوسىلعان. وسى ۇيىمدارعا كەلۋشىلەر اراسىنان 157 ادام - «سارى»، 66 ادام - «قىزىل» ستاتۋسى بار ەكەندىگى انىقتالعان. بۇل كورسەتكىشتەر وتە تومەن ەكەندىگى، قالا كولەمىندەگى احۋالدى تولىق كورسەتە المايتىندىعى ايتىلدى.
اۋدان اكىمدەرىنە، سالالىق باسقارما باسشىلارىنا «اتامەكەن» ۇلتتىق كاسىپكەرلەر پالاتاسى قالالىق فيليالىمەن بىرلەسە جوبانىڭ تيىمدىلىگىن تۇسىندىرۋگە ارنالعان اقپاراتتىق جۇمىستاردى كۇشەيتۋدى تاپسىردى.
