“شىمكەنت قالاسىنىڭ مادەنيەت، تىلدەردى دامىتۋ جانە ارحيۆتەر” باسقارماسىنىڭ باستاماسىمەن “كىتاپ - جان دارۋمەنى” جوباسى قولعا الىنىپ، جەرگىلىكتى 12 اۋرۋحانا، ەمحانا جانە بالالار اۋرۋحانالارىنا كلاسسيكالىق جانە زاماناۋي اۆتورلاردىڭ تۋىندىلارىمەن تولىقتىرىلدى.
ەم الۋشى شىمكەنتتىكتەر قالاعان كىتابىن الىپ، اۋرۋحانادا وتكىزۋگە ءماجبۇر ۋاقىتىنا وزگەشەلىك ەنگىزە الادى.
“وكىنىشكە قاراي، اۋرۋحانالاردا ناۋقاستار سانى ازايماي وتىر. وعان قوسا، ۇزاق مەرزىمدى ەمگە مۇقتاج ازاماتتار دا بار. جەرلەستەرىمىزدىڭ ەمىنە ءسال دە بولسا كومەگىمىزدى تيگىزسەك دەگەن نيەتىمىزدى وسى جوبا ارقىلى ىسكە اسىرىپ وتىرمىز.
ەمدەلۋ تەك فيزيكالىق قانا ەمەس، ەموسيونالدىق جاعدايعا دا بايلانىستى.
كىتاپ وقىپ، ويىن جاقسى جاققا اۋدارۋدىڭ اسەرى ەم الۋشىلارعا تەزىرەك ساۋىعىپ كەتۋگە ىقپالىن تيگىزەدى دەپ ۇمىتتەنەمىز.” - دەپ جوبا ۇيىمداستىرۋشىلارى ءوز ويىمەن ءبولىستى.
قازىرگى تاڭدا 12 اۋرۋحانادا باستاۋ العان بۇل جوبا باسقا دا قالالىق اۋرۋحانالاردا ءوز جالعاسىن تابادى دەپ كۇتىلۋدە.
تۋىندىلار اراسىندا م. اۋەزوۆ، ۋ. شەكسپير كىتاپتارىن، زاماناۋي جازۋشىلاردىڭ ەڭبەكتەرىن جانە بالالارعا ارنالعان سان الۋان كىتاپشالارى مەن ەرتەگىلەردى كەزدەستىرۋگە بولادى. ءوز كىتابىمەن بولىسۋگە نيەت بىلدىرگەن ادامدار دا كىتاپ سورەلەرىن تولىقتىرا الادى.
