بۇل تۋرالى اقپاراتتىق-كوممۋنيكاسيالىق ورتالىعىندا وتكەن بريفينگتە شىمكەنت قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى ءابدىماناپ تولەبايەۆ ءمالىم ەتتى.

– شىمكەنت قالاسىندا وسى جىلدىڭ 17 تامىزىنان باستاپ «ق ر باس مەملەكەتتىك سانيتاريالىق دارىگەرىنىڭ 2021 جىلعى 11 ماۋسىمداعى №28 قاۋلىسىنا تولىقتىرۋ ەنگىزۋ تۋرالى» 2021 جىلعى 12 تامىزداعى №35 قاۋلىسىن باسشىلىققا الىپ بەلسەندىلىگى جويىلعان نەمەسە يناكتيۆيرلەنگەن (Sinopharm-قحر) COVID-19-عا قارسى «Vero Cell» ۆاكسيناسىن قولدانۋ باستالدى.

بۇل – ەلىمىزدە جانە ءبىزدىڭ قالادا دا كۆي-عا قارسى قولدانىپ وتىرعان 5-ۆاكسينا. ياعني، ءۇشىنشى مەگاپوليسكە «Vero Cell» ۆاكسيناسىنىڭ 80 000 دوزاسى جەتكىزىلدى. ونىڭ 40 000 دوزاسى 1-كومپونەنتكە، ال 40 000 دوزاسى 2-كومپونەنتكە ارنالعان. بۇگىندە اتالعان ۆاكسينانىڭ 40 مىڭ دوزاسى دسب تاراپىنان بارلىق ەگۋ پۋنكتىنە تاراتىلدى. بۇل ەكپە 18 جاستان اسقان ەرەسەكتەرگە ارنالعان. وندا انتيبيوتيكتەر مەن كونسەرۆانتتار جوق، – دەدى ءابدىماناپ قوشقار ۇلى.

سپيكەردىڭ سوزىنشە، ەگەر ۆاكسيناسيادان كەيىن جۇيكە جۇيەسى تاراپىنان جاعىمسىز رەاكسيالار پايدا بولسا، وسى ءونىمدى قايتا پايدالانۋعا تىيىم سالىنادى.

ايتا كەتەيىك، ۆاكسينانى ەنگىزۋگە قارسى كورسەتىلىمدەر:

1) ۆاكسينانىڭ كەز كەلگەن كومپونەنتىنە (ونىڭ ىشىندە قوسىمشا زاتتارعا) اللەرگيا؛

2) ۆاكسيناعا اللەرگيالىق رەاكسيالار (جەدەل اللەرگيالىق رەاكسيا، انگيونيەۆروزدىق ءىسىنۋ، ەنتىگۋ)؛

3) باقىلانبايتىن ەپيلەپسيا نەمەسە جۇيكە جۇيەسىنىڭ باسقا دا ۇدەمەلى اۋرۋلارى، سونداي-اق انامنەزىندە گييەن-باررە سيندرومىنىڭ بولۋى؛

4) جۇكتىلىك جانە لاكتاسيا كەزەڭى مەن 18 جاسقا دەيىن جاس ەرەكشەلىك بولىپ ەسەپتەلەدى.