بۇگىن، شىلدە ايىنىڭ 27ء-سى كۇنى ساعات 10.00-دە شىعىس قازاقستانداعى 19 قالا مەن اۋداندا ءبىر مەزەتتە #Birge #TazaQazaqstan اتتى ەكولوگيالىق اكسيا باستاۋ الدى. وعان ايماقتاعى 33 مىڭنان استام تۇرعىن جينالىپ، دەمالىس ورىندارىنىڭ اۋماعىن قوقىستان تازارتۋعا قاتىستى.
ءسويتىپ، بىرنەشە ساعاتتىڭ ىشىندە 800 توننادان نەمەسە 3206 تەكشە مەتردەن استام قوقىس جينالىپ، ارالدار مەن ساياباقتار، وزەن جاعالاۋلارى، قازانشۇڭقىرلار (كوتلوۆان)، سونداي-اق پولكوۆنيچيي مەن كومسومول ارالدارى، ءۇلبى جاعالاۋى قالپىنا كەلتىرىلدى.
- ءبىز بۇل اكسياعا قاتىسقانىمىزعا قۋانىشتىمىز. شىعىس قازاقستان ءاردايىم اسەم تابيعاتىمەن كوز تارتادى. سول سەبەپتەن ءبىز ءوڭىرىمىزدىڭ ودان سايىن قۇلپىرىپ، گۇلدەنۋىنە ۇلەس قوسۋىمىز كەرەك. ءبىز ماڭايدى جيناپ جۇرگەن كەزدە ەكولوگيامىزعا زيان كەلتىرەتىن پلاستيك ىدىستاردى كوپتەپ جينادىق.
سوندىقتان ءبارىمىز تابيعاتتى ايالاپ، اركىم ءوز سوڭىنان قوقىستى جيناپ جۇرسە ەكەن دەگەن تىلەگىمىز بار، - دەيدى وسكەمەن قالاسىنىڭ تۇرعىنى ماليكا ەليۋبايەۆا.
اكسياعا قاتىسۋشىلارعا شىعىس قازاقستان وبلىسى اكىمىنىڭ ءبىرىنشى ورىنباسارى ەرلان ايمۇقاشيەۆ العىسىن ءبىلدىردى.
- قورشاعان ورتانى قورعاۋدى ءارقايسىمىز وزىمىزدەن باستاۋىمىز كەرەك. بۇل ءبىزدىڭ كەلەر ۇرپاق الدىنداعى پارىزىمىز. اتالمىش اكسيانى داستۇرگە اينالدىرۋ ءۇشىن ءبىز جاستارعا ۇلگى كورسەتۋىمىز كەرەك، - دەدى ول.
