Búgin, shilde aiynyń 27-si kúni saǵat 10.00-de Shyǵys Qazaqstandaǵy 19 qala men aýdanda bir mezette #Birge #TazaQazaqstan atty ekologiialyq aktsiia bastaý aldy. Oǵan aimaqtaǵy 33 myńnan astam turǵyn jinalyp, demalys oryndarynyń aýmaǵyn qoqystan tazartýǵa qatysty.
Sóitip, birneshe saǵattyń ishinde 800 tonnadan nemese 3206 tekshe metrden astam qoqys jinalyp, araldar men saiabaqtar, ózen jaǵalaýlary, qazanshuńqyrlar (kotlovan), sondai-aq Polkovnichii men Komsomol araldary, Úlbi jaǵalaýy qalpyna keltirildi.
- Biz bul aktsiiaǵa qatysqanymyzǵa qýanyshtymyz. Shyǵys Qazaqstan árdaiym ásem tabiǵatymen kóz tartady. Sol sebepten biz óńirimizdiń odan saiyn qulpyryp, gúldenýine úles qosýymyz kerek. Biz mańaidy jinap júrgen kezde ekologiiamyzǵa ziian keltiretin plastik ydystardy kóptep jinadyq.
Sondyqtan bárimiz tabiǵatty aialap, árkim óz sońynan qoqysty jinap júrse eken degen tilegimiz bar, - deidi Óskemen qalasynyń turǵyny Malika Eliýbaeva.
Aktsiiaǵa qatysýshylarǵa Shyǵys Qazaqstan oblysy ákiminiń birinshi orynbasary Erlan Aimuqashev alǵysyn bildirdi.
- Qorshaǵan ortany qorǵaýdy árqaisymyz ózimizden bastaýymyz kerek. Bul bizdiń keler urpaq aldyndaǵy paryzymyz. Atalmysh aktsiiany dástúrge ainaldyrý úshin biz jastarǵa úlgi kórsetýimiz kerek, - dedi ol.
