بۇگىن وسكەمەن قالاسى تۇرعىندارىنىڭ سۇيىكتى دەمالىس ورنىنا اينالعان كوتلوۆان جاعالاۋىندا اۋماقتى تازارتۋ جۇمىستارى جۇرگىزىلدى. تۇرعىندار جاعالاۋدان 200 قاپ قوقىس جيناپ شىعاردى، – دەپ حابارلايدى Dalanews.kz شقو اكىمىنىڭ باسپا ءسوز قىزمەتىنە سىلتەمە جاساپ.
بۇل جەر رەسمي تۇردە جاعاجاي بولىپ سانالمايدى، ءبىراق كەلەسى جىلى بۇل جاعالاۋدا جاڭا وزگەرىستەر ورىن الماق. بۇگىنگى تاڭدا سۋ قويمالارىن جاقسارتۋ بويىنشا اۋقىمدى جوبا دايىندالۋدا.
– بۇكىل بالالىق شاعىمىز وسى سۋ قويمالاردا ويناۋمەن ءوتتى دەۋگە بولادى. مۇندا مەن ءجۇزۋدى ۇيرەندىم، وتباسىلىق دەمالىستى ءجيى وتكىزىپ تۇراتىنبىز. جىلدار وتە كەلە مۇندا قوقىس كوبەيىپ، دەمالۋعا ىڭعايلى بولمادى. ارينە، ءبىز ءار دەمالىستان كەيىن ءوز ورنىمىزدى جينايمىز، ءبىراق بارلىعىن باقىلاۋدا ۇستاۋ مۇمكىن ەمەس. ءقازىر وسىنداي ۇلكەن ۇجىممەن قوقىستىڭ كوپ بولىگىن جيناپ، شىعارعانىمىزعا قۋانىشتىمىن، – دەيدى قالا تۇرعىنى انگەلينا سيدورەنكو.
وسكەمەندە بارلىعى 100-دەن استام ەكو-شارا وتكىزىلدى. 492 اۋماق تازالانىپ، 3871 شارشى مەتر قوقىس شىعارىلدى، قازاقستان تاۋىندا 500 كوشەت وتىرعىزىلدى، رۇقسات ەتىلمەگەن ۇيىندىلەر جويىلۋدا. «تازا ويىنداردىڭ» 2 ماۋسىمى وتكىزىلىپ، سوڭعى ماۋسىمىندا 130-دان استام ادام تارتىلىپ، 3 توننا قوقىس شىعارىلدى. ەڭ كوپ قوقىس جيناعان جەڭىمپازدار اقشالاي سىيلىقتارمەن ماراپاتتالدى.
سونداي-اق، قازاقستان كوشەسى قايتا جوندەلىپ، قابانباي باتىر مەن پۋشكين كوشەلەرى بويىندا جاياۋ جۇرگىنشىلەر ايماعى جانە الاڭدار اباتتاندىرىلۋدا، نازاربايەۆ، شاكارىم داڭعىلدارى مەن قازاقستان كوشەسى بويىنداعى ۇيلەردىڭ قاسبەتتەرى جوندەلۋدە.
قابانباي باتىر-قازاقستان، قازاقستان – م.گوركيي، ساتبايەۆ – بايباچين قيىلىستارى اۋداندارىندا گۇلدەر وتىرعىزىلدى، جاڭا سۋارۋ جۇيەلەرى ىسكە قوسىلدى.
ۆولونتەرلەر «ارداگەرلەرگە تاعزىم» اكسياسى اياسىندا جالعىز تۇراتىن زەينەتكەرلەرگە تۇرعىن ۇيلەردىڭ اۋماقتارىن تازالاۋعا كومەكتەستى.
