Búgin Óskemen qalasy turǵyndarynyń súıikti demalys ornyna aınalǵan Kotlovan jaǵalaýynda aýmaqty tazartý jumystary júrgizildi. Turǵyndar jaǵalaýdan 200 qap qoqys jınap shyǵardy, – dep habarlaıdy Dalanews.kz SHQO ákiminiń baspasóz qyzmetine silteme jasap.

Bul jer resmı túrde jaǵajaı bolyp sanalmaıdy, biraq kelesi jyly bul jaǵalaýda jańa ózgerister oryn almaq. Búgingi tańda sý qoımalaryn  jaqsartý boıynsha aýqymdy joba daıyndalýda.

– Búkil balalyq shaǵymyz osy sý qoımalarda oınaýmen ótti deýge bolady. Munda men júzýdi úırendim, otbasylyq demalysty jıi ótkizip turatynbyz. Jyldar óte kele munda qoqys kóbeıip, demalýǵa yńǵaıly bolmady. Árıne, biz ár demalystan keıin óz ornymyzdy jınaımyz, biraq barlyǵyn baqylaýda ustaý múmkin emes. Qazir osyndaı úlken ujymmen qoqystyń kóp bóligin jınap, shyǵarǵanymyzǵa qýanyshtymyn, – deıdi qala turǵyny Angelına Sıdorenko.

Óskemende barlyǵy 100-den astam eko-shara ótkizildi. 492 aýmaq tazalanyp, 3871 sharshy metr qoqys shyǵaryldy, Qazaqstan taýynda 500 kóshet otyrǵyzyldy, ruqsat etilmegen úıindiler joıylýda. «Taza oıyndardyń» 2 maýsymy ótkizilip, sońǵy maýsymynda 130-dan astam adam tartylyp, 3 tonna qoqys shyǵaryldy. Eń kóp qoqys jınaǵan jeńimpazdar aqshalaı syılyqtarmen marapattaldy.

Sondaı-aq, Qazaqstan kóshesi qaıta jóndelip, Qabanbaı batyr men Pýshkın kósheleri boıynda jaıaý júrginshiler aımaǵy jáne alańdar abattandyrylýda, Nazarbaev, Shákárim dańǵyldary men Qazaqstan kóshesi boıyndaǵy úılerdiń qasbetteri jóndelýde.

Qabanbaı Batyr-Qazaqstan, Qazaqstan – M.Gorkıı, Sátbaev – Baıbachın qıylystary aýdandarynda gúlder otyrǵyzyldy, jańa sýarý júıeleri iske qosyldy.

Volonterler «Ardagerlerge taǵzym» aksıasy aıasynda jalǵyz turatyn zeınetkerlerge turǵyn úılerdiń aýmaqtaryn tazalaýǵa kómektesti.