قازاقستاندىق ارالاس جەكپە-جەك شەبەرى شاۆكات راحمونوۆتىڭ جۇبايى گۇلايىم راحمونوۆا الەۋمەتتىك جەلىدە وزدەرىنىڭ اجىراسقانىن مالىمدەدى، دەپ حابارلايدى Dalanews.kz.

ونىڭ ايتۋىنشا، سپورتشى اجىراسقاننان كەيىن بالالارىنان باس تارتقان. گۇلايىم راحمونوۆا ءتورت بالا تاربيەلەپ وتىرعانىن جانە بەسىنشى ءسابيىن كۇتىپ جۇرگەنىن جەتكىزدى.

"اجىراسقاننان كەيىن بالالار اناسىنا عانا كەرەك. بۇگىن ول ءبارىبىر انالارىنا ۇقساپ كەتەدى دەپ ءوز بالالارىنان باس تارتتى... سونشالىق قامقور اكە ءبىر كۇننىڭ ىشىندە وزگەرىپ، بالالارىن كەرەك ەتپەي قالادى دەپ ەشقاشان ويلاماعان ەدىم. ءيا، مەن 4 بالا دۇنيەگە اكەلدىم جانە بەسىنشىسىن كۇتىپ وتىرمىن. ...اكەسىنە بالالارى كەرەك بولماسا، بالالارعا دا اكەسى كەرەك ەمەس!" – دەپ جازدى ول.

ازىرگە بۇل ماسەلەگە قاتىستى شاۆكات راحمونوۆ رەسمي پىكىر بىلدىرگەن جوق.

ەسكە سالايىق، گۇلايىم راحمونوۆا مەن ونىڭ ۇلى 2025 جىلى 27 شىلدەدە جول اپاتىنا تۇسكەن ەدى.

پوليسيانىڭ مالىمەتىنشە، رەسپۋبليكالىق ماڭىزى بار الماتى–ەكاتەرينبۋرگ تاسجولىنىڭ 299-شاقىرىمىندا Toyota Land Cruiser 200 كولىگىنىڭ جۇرگىزۋشىسى تىزگىنگە يە بولا الماي، كولىكتى اۋدارىپ العان. جول اپاتى سالدارىنان ەكى ايەل قازا تاپقان بولاتىن.

كەيىنىرەك جول اپاتىنان قازا تاپقان قىزدىڭ وتباسى سپورتشى شاۆكات راحمونوۆتىڭ جۇبايىن كەشىردى.