مەملەكەت باسشىسى قاسىم-جومارت توقايەۆ قازاقستاندا ۇزدىك شەتەلدىك جوعارى وقۋ ورىندارىنىڭ فيليالدارىن اشۋدى تاپسىردى. بۇل باستاما وتاندىق ۋنيۆەرسيتەتتەردىڭ عىلىمي جانە اكادەميالىق الەۋەتىن نىعايتۋعا، وزىق الەمدىك تاجىريبەنى ەنگىزۋگە جانە ەلىمىزدىڭ ءبىلىم بەرۋ جۇيەسىن ترانسفورماسيالاۋعا باعىتتالعان، – دەپ حابارلايدى Dalanews.kz اباي وبلىسى اكىمىنىڭ باسپا ءسوز قىزمەتىنە سىلتەمە جاساپ.

بۇگىنگى تاڭدا 34 شەتەلدىك جوعارى وقۋ ورىندارىمەن كەلىسىم-شارت جاسالعان. ەلىمىزدە 23 سەرىكتەس ۋنيۆەرسيتەت بار، وندا مىڭداعان ستۋدەنتتەر پەداگوگيكا، ينجەنەريا جانە جاساندى ينتەللەكت سياقتى 34 ماماندىق بويىنشا ءبىلىم الۋدا.

تابىستى حالىقارالىق ىنتىماقتاستىقتىڭ جارقىن مىسالدارىنىڭ بىرىمەن اباي وبلىسى اكىمىنىڭ ورىنباسارى جاسۇلان سارسەبايەۆ ءبولىستى. 2023 جىلدىڭ مامىر ايىندا سەمەي قالاسىنداعى شاكارىم اتىنداعى ۋنيۆەرسيتەتتە بىدگوشش قالاسىنداعى ەكونوميكا ۋنيۆەرسيتەتىنىڭ (WSG University in Bydgoszcz) فيليالىن اشۋ تۋرالى كەلىسىمگە قول قويىلدى.

– بۇل فيليال ستۋدەنتتەرگە ەۋروپالىق ستاندارتتارعا سايكەس اعىلشىن جانە ورىس تىلدەرىندە ءبىلىم الۋعا بىرەگەي مۇمكىندىك بەرەدى. ۇسىنىلاتىن باعدارلامالارعا «سپورت جانە دەمالىس مەنەدجەرى» (ورىس تىلىندە) جانە «مەحاترونيكا» (اعىلشىن تىلىندە) كىرەدى. ءقازىر فيليالدا 44 ستۋدەنت ءبىلىم الۋدا. وقۋدى اياقتاعاننان كەيىن ولار ەۋروپالىق ۇلگىدەگى ديپلومعا يە بولادى، بۇل وقۋ ۇدەرىسىن ينتەرناسيونالداندىرۋعا سەپتىگىن تيگىزىپ، تۇلەكتەرىمىزگە جاڭا پەرسپەكتيۆالار اشادى، – دەپ اتاپ ءوتتى جاسۇلان سارسەبايەۆ.

شاكارىم ۋنيۆەرسيتەتىنىڭ حالىقارالىق ىنتىماقتاستىعىنىڭ تاعى ءبىر ماڭىزدى باعىتى – قوس ديپلومدىق باعدارلامالاردى جۇزەگە اسىرۋ. كيۋنگدونگ ۋنيۆەرسيتەتىمەن (وڭتۇستىك كورەيا) IT جانە حالىقارالىق بيزنەس سياقتى سالالارداعى باعدارلامالار ءساتتى جۇزەگە اسىرىلۋدا.

– نەگىزگى ماقساتتاردىڭ ءبىرى – ءاربىر ستۋدەنتتىڭ حالىقارالىق دەڭگەيدە ءبىلىم الۋىنا تەڭ مۇمكىندىكتەر بەرۋ. وسىعان وراي ۋنيۆەرسيتەت جۇڭگو، وڭتۇستىك كورەيا، اقش، تۇركيا سياقتى ءتۇرلى ەلدەردىڭ جەتەكشى عالىمدارىن ۇنەمى ءدارىس وقۋعا شاقىرادى. سونىمەن قاتار، ۋنيۆەرسيتەتتە شەتەلدىك وقىتۋشىلار تۇراقتى جۇمىس ىستەيدى. وسىلايشا ءبىلىم ساپاسى جاقسارىپ، يننوۆاسيالىق زەرتتەۋلەر ەنگىزىلۋدە، بۇل شاكارىم ۋنيۆەرسيتەتىنىڭ ۇستانىمىن نىعايتا تۇسەدى، – دەپ قوستى اكىمنىڭ ورىنباسارى.

ستۋدەنتتەردىڭ دايىندىعىنىڭ جوعارى دەڭگەيىن حالىقارالىق رەيتينگتەر راستايدى. وسىلايشا، QS Asia University Rankings 2025 رەيتينگىندە شاكارىم ۋنيۆەرسيتەتى ازياداعى 984 ۋنيۆەرسيتەت اراسىندا №501–520 ورىندارعا يە بولدى. ونىڭ ۇستىنە سوڭعى ەكى جىلدا بۇل رەيتينگتەگى جوو سانى 142-گە كوبەيسە، ۋنيۆەرسيتەت 100 ورىنعا العا جوعارىلادى.

ۋنيۆەرسيتەت ەكولوگيالىق باستامالاردى دا بەلسەندى دامىتۋدا. تۇراقتى دامۋدى باعالايتىن UI Green Metric World University Ranking 2024 رەيتينگىندە شاكارىم ۋنيۆەرسيتەتى الەمدە 662-ورىنعا، ال قازاقستاندىق ۋنيۆەرسيتەتتەر اراسىندا 8ء-شى ورىنعا يە بولدى.