سوڭعى ءۇش جىلدا قازاقستاندا ەكولوگيالىق زاڭنامانى بۇزعانى ءۇشىن كاسىپورىندارعا ايتارلىقتاي كولەمدە ايىپپۇل سالىندى. بۇل تۋرالى سەنات دەپۋتاتى، اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ حاتشىسى ولگا بۋلاۆكينا ايتتى، دەپ حابارلايدى Dalanews.kz Kazinform-عا سىلتەمە جاساپ.
اتاپ ايتقاندا، اتىراۋ وبلىسىنداعى ءبىرقاتار كاسىپورىنعا ءىرى ايىپپۇلدار سالىنعان:
- "Oxygenator" ج ش س 13 568 توننا مۇناي قالدىعىن ەكولوگيالىق رۇقساتسىز كادەگە جاراتقانى ءۇشىن 37،4 ملرد تەڭگە؛
- "كاسپيي نەفت" اق قاجەتتى قۇجاتتارسىز قالدىقتاردى ساقتاعانى ءۇشىن 13،7 ملرد تەڭگە؛
- "Karabatan Utility Solutions" ج ش س (سامۇرىق-قازىنا قۇرىلىمىنا كىرەدى) – بولىنگەن كومىرتەك كۆوتالارىن ارتتىرعانى ءۇشىن 7،2 ملرد تەڭگە؛
- "تەڭىزشيەۆرويل" ج ش س رۇقسات ەتىلگەن شەكتەردەن اساتىن زياندى زاتتاردى شىعارعانى ءۇشىن 2،8 ملرد تەڭگە؛
- "كوحان" اق – ەكولوگيالىق رۇقساتسىز ءقاۋىپتى قالدىقتاردى جيناقتاعانى ءۇشىن 9،5 ملرد تەڭگە؛
- NCOC (North Caspian Operating Company) – تازارتىلماعان اعىن سۋلاردى اعىزعانى ءۇشىن 196 ملن تەڭگە، ال فاكەل گازىن جاعۋ نورماتيۆتەرىن بۇزعانى ءۇشىن 12 ملرد تەڭگە ايىپپۇل الدى.
- "جان ي كس" ج ش س ەكولوگيالىق تالاپتارعا ساي كەلمەيتىن قالدىقتاردى ساقتاعانى ءۇشىن 3 ملرد تەڭگە ايىپپۇل الدى.
- "دالا-ەكوس" ج ش س ءقاۋىپتى قالدىقتاردى زاڭسىز جيناپ، وڭدەگەنى ءۇشىن 3 ملرد تەڭگە ايىپپۇل سالىندى.
سونىمەن بىرگە، شىعىس قازاقستان وبلىسىندا "قازمىرىش" ج ش س ەكولوگيالىق تالاپتاردى بۇزعانى ءۇشىن 49،6 ملن تەڭگە ايىپپۇل الدى.
قىزىلوردا وبلىسىندا بەينەۋ-شىمكەنت گاز قۇبىرىنا ەكولوگيالىق بۇزۋشىلىقتار ءۇشىن 523 ملن تەڭگە ايىپپۇل سالىنعان.
اباي وبلىسىندا "ەكو-سەمەي" ج ش س قورشاعان ورتانى لاستاعانى ءۇشىن 296 ملن تەڭگە ايىپپۇلمەن جازالاندى.
"ايىپپۇلداردىڭ نەگىزگى سەبەپتەرى – نورماتيۆتەن تىس زياندى شىعارىندىلار، ەكولوگيالىق رۇقساتتىڭ بولماۋى، زاڭسىز قوقىس الاڭدارى مەن قالدىقتاردى كادەگە جاراتۋ، سۋ رەسۋرستارىن لاستاۋ بولىپ وتىر"، دەلىنگەن سەنات حابارلاماسىندا.
نەگىزىنەن، قولدانىستاعى زاڭناماعا سايكەس، ءاربىر كاسىپورىن قالدىقتاردى باسقارۋ باعدارلاماسىن ازىرلەۋگە مىندەتتى. بۇل باعدارلاما قالدىقتاردىڭ كولەمىن بارىنشا ازايتۋ ماقساتىندا ەڭ وزىق قولجەتىمدى تەحنولوگيالاردى پايدالانۋدى ەسكەرۋى ءتيىس.
ايتا كەتسەك، سەناتتاعى ولگا بۋلاۆكينا - ەكولوگيالىق ماسەلەسى وزەكتى شىعىس قازاقستان وبلىسىنان سايلانعان دەپۋتات.
