Sońǵy úsh jylda Qazaqstanda ekologiialyq zańnamany buzǵany úshin kásiporyndarǵa aitarlyqtai kólemde aiyppul salyndy. Bul týraly Senat depýtaty, Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń hatshysy Olga Býlavkina aitty, dep habarlaidy Dalanews.kz Kazinform-ǵa silteme jasap.
Atap aitqanda, Atyraý oblysyndaǵy birqatar kásiporynǵa iri aiyppuldar salynǵan:
- "Oxygenator" JShS 13 568 tonna munai qaldyǵyn ekologiialyq ruqsatsyz kádege jaratqany úshin 37,4 mlrd teńge;
- "Kaspii Neft" AQ qajetti qujattarsyz qaldyqtardy saqtaǵany úshin 13,7 mlrd teńge;
- "Karabatan Utility Solutions" JShS (Samuryq-Qazyna qurylymyna kiredi) – bólingen kómirtek kvotalaryn arttyrǵany úshin 7,2 mlrd teńge;
- "Teńizshevroil" JShS ruqsat etilgen shekterden asatyn ziiandy zattardy shyǵarǵany úshin 2,8 mlrd teńge;
- "Kohan" AQ – ekologiialyq ruqsatsyz qaýipti qaldyqtardy jinaqtaǵany úshin 9,5 mlrd teńge;
- NCOC (North Caspian Operating Company) – tazartylmaǵan aǵyn sýlardy aǵyzǵany úshin 196 mln teńge, al fakel gazyn jaǵý normativterin buzǵany úshin 12 mlrd teńge aiyppul aldy.
- "Jan i KS" JShS ekologiialyq talaptarǵa sai kelmeitin qaldyqtardy saqtaǵany úshin 3 mlrd teńge aiyppul aldy.
- "Dala-Ekos" JShS qaýipti qaldyqtardy zańsyz jinap, óńdegeni úshin 3 mlrd teńge aiyppul salyndy.
Sonymen birge, Shyǵys Qazaqstan oblysynda "Qazmyrysh" JShS ekologiialyq talaptardy buzǵany úshin 49,6 mln teńge aiyppul aldy.
Qyzylorda oblysynda Beineý-Shymkent gaz qubyryna ekologiialyq buzýshylyqtar úshin 523 mln teńge aiyppul salynǵan.
Abai oblysynda "EKO-Semei" JShS qorshaǵan ortany lastaǵany úshin 296 mln teńge aiyppulmen jazalandy.
"Aiyppuldardyń negizgi sebepteri – normativten tys ziiandy shyǵaryndylar, ekologiialyq ruqsattyń bolmaýy, zańsyz qoqys alańdary men qaldyqtardy kádege jaratý, sý resýrstaryn lastaý bolyp otyr", delingen Senat habarlamasynda.
Negizinen, qoldanystaǵy zańnamaǵa sáikes, árbir kásiporyn qaldyqtardy basqarý baǵdarlamasyn ázirleýge mindetti. Bul baǵdarlama qaldyqtardyń kólemin barynsha azaitý maqsatynda eń ozyq qoljetimdi tehnologiialardy paidalanýdy eskerýi tiis.
Aita ketsek, Senattaǵy Olga Býlavkina - ekologiialyq máselesi ózekti Shyǵys Qazaqstan oblysynan sailanǵan depýtat.
