شقو توتەنشە جاعداي باسقارماسىنىڭ ءمالىم ەتكەنىندەي سەمەيدەگى گاگارين كوشەسىنىڭ بويىندا ورنالاسقان دۇكەندە ءورت شىققان. نىساننىڭ اعاشپەن شاپتالعان بولىگى جانە توقاش ونىمدەرىن پىسىرەتىن ۇلكەن ەلەكتر پەشى وتقا ورانعان.
سەمەيلىك ءورت سوندىرۋشىلەر وقيعا ورنىنا ەدەل-جەدەل جەتكەن.
“ءتىلسىز جاۋدى تەزدەتىپ اۋىزدىقتاماساق، ونىڭ جالىنى جانىنداعى نىساندارعا دا تارالار ەدى. ءورتتىڭ جالپى اۋماعى 16 شارشى مەتردى قۇراعان. وقيعا ورنىنا شۇعىل جەتكەن ءورت سوندىرۋشىلەر باسىن قاتەرگە تىگىپ دۇكەننىڭ ىشىندە قالعان، ءارى جارىلۋعا شاق تۇرعان 6 گاز باللوندى سىرتقا الىپ شىقتى.
دۇكەن قىزمەتكەرلەرى ءورت تۇتانعان ساتتە تىسقا شىعىپ ۇلگەردى، زارداپ شەككەندەر جوق”، – دەپ مالىمدەدى باسقارمانىڭ باسپا ءسوز قىزمەتى.
قىزىل جالىنمەن كۇرەسكە جەكە قۇرامنان 14 ادام جانە 3 تەحنيكا جۇمىلدىرىلدى. ءورتتىڭ شىعۋ سەبەبى انىقتالۋ ۇستىندە، الدىن-الا مالىمەت بويىنشا دۇكەن يەلەرى ەلەكتر جابدىقتارىن جاڭالاماعان، ءورت قاۋىپسىزدىگى تالاپتارىنا نەمقۇرايلى قاراعان.
