سەمەيدىڭ تەرى وڭدەۋ كومبيناتى ىسكە قوسىلدى

Dalanews 06 تام. 2020 05:25 1068

سوڭعى 10 جىلدان بەرى توقتاپ تۇرعان سەمەيدەگى تەرى وڭدەۋ زاۋىتا قايتادان ىسكە قوسىلدى. ءوندىرىس ورنىنا قارجى قۇيعان ينۆەستور ەكى اي بويى دايىندىق جۇمىستارىن جۇرگىزىپ، كۇنى كەشە عانا ءوندىرىستى ىسكە قوسىپ، العاشقى ونىمىنە يە بولدى.

ۇستىمىزدەگى جىلدىڭ 3 ماۋسىمىندا «قازاقستاننىڭ ينۆەستيسيالىق قورى» اق مەن حالىقارالىق «Kusto Group»  كومپانيالار توبىنا كىرەتىن «Semey Tannery» ج ش س سەمەي قالاسىنداعى تەرى وڭدەۋ زاۋىتىن جالعا الىپ، ارتىنشا ساتىپ الۋ شارتىنا قول قويعان بولاتىن.

جاڭادان ىسكە قوسىلعان كاسىپورىن الداعى ۋاقىتتا قازاقستاندا مال شارۋاشىلىعىمەن اينالىساتىن شارۋاشىلىقتارمەن تىعىز ارىپتەستىك قارىم-قاتىناستا ورناتىپ، مال تەرىلەرىن جيناپ، ودان دايىن ءونىم شىعارۋدى كوزدەپ وتىر.

ينۆەستور ەكى ايدىڭ ىشىندە زاۋىتتىڭ ايماعىن رەتكە كەلىتىرىپ، تەرى وڭدەۋگە قاجەتتى جابدىقتاردى ورناتىپ، ءوندىرىس وشاعىن ىسكە قوسىپتى. زاۋىتتى ىسكە قوسۋ بارىسىندا كارىز جۇيەلەرى تولىقتاي تازارتىلىپ، بارلىق جابىدىقتارعا كۇردەلى جوندەۋ جۇمىستارى جۇرگىزىلگەن. سونداي-اق، جۇمىسشىلار جۋىناتىن ورىن جاسالىنىپتى. الداعى ۋاقىتتا كومبينات تەرىدەن دايىن جانە جارتىلاي فابريكات ونىمدەر شىعارىپ، ىشكى نارىق پەن سىرت ەلدەرگە ساۋدالاماقشى.

قازىرگى تاڭدا زاۋىتتا 60 ادام تۇراقتى جۇمىسپەن قامتىلعان. ولاردىڭ كوپشىلىگى كەزىندە وسى ءوندىرىس وشاعىندا جۇمىس ىستەگەن تەحنيكالىق ماماندار ەكەنىن ايتا كەتۋىمىز كەرەك. جەرگىلىكتى تۇرعىندار ايگىلى زاۋىتتىڭ قايتا ىسكە قوسىلىپ، جۇرتتى جۇمىسپەن قامتىعانىنا ءدان ريزا. زاۋىت باسشىلىعى الداعى ۋاقىتتا ءوندىرىس وشاعى تولىق قۋاتىندا جۇمىس ىستەگەندە زاۋىتتا جۇمىسكەرلەرىنىڭ سانىن 200-گە دەيىن ارتاتىنىن العا تارتۋدا.


زاۋىتتىڭ العاشقى ىسكە قوسۋ جۇمىستارى ءساتتى باستالىپ، ءقازىردىڭ وزىندە جالپى اۋماعى 3000 شارشى/مەتردى قۇرايتىن ساپاسى جوعارى wet blue  جارتىلاي فابريكات ءونىمى الىنعانىن «Semey Tannery» سەرىكتەستىگىنىڭ اتقارۋشى ديرەكتورى رۋسلان بيسەنوۆ ءمالىم ەتتى.

الداعى ۋاقىتتا ءوندىرىس وشاعى تولىق كۇش-قۋاتىندا جۇمىس ىستەگەن جاعدايدا جىلىنا 1،7 ملن شارشى/مەتر wet blue ساپالى تەرى ءونىمىن وندىرەتىن بولادى. وسى رەتتە كاسىپورىن قاجەتتى شيكىزات پەن تەرەڭ وڭدەۋگە قاجەتتى حيميالىق پرەپاراتتاردى ەلىمىز بەن كورشىلەس رەسەيدەن جەتكىزىپ وتىرعاندارىن تىلگە تيەك ءوتتى.

ۇسىنىلعان
سوڭعى جاڭالىقتار