ەستەرىڭىزگە سالا كەتسەك، بىلتىر ۇلىستىڭ ۇلى كۇنى سەمەي قالاسىندا ون جىلدان استام ۋاقىت كۇتكەن جاڭا مەشىت اشىلعان ەدى. 2008 جىلى باستالعان ءىستى اقىرى 2018 جىلى بەلگىلى كاسىپكەر دۋلات تاستەكەيەۆ قولعا الىپ، ءوز قاراجاتىمەن جۇمىستى قايتا جانداندىرعان كاسىپكەر باستالعان ءىستى سوڭىنا دەيىن جەتكىزگەن. مەشىت سالىنعانىمەن وعان اپارار جول جوق ەدى. قالا اقساقالدارى بىرنەشە رەت وسى ماسەلەنى كوتەرگەن بولاتىن.
- تۇرعىندار، سونىڭ ىشىندە قالا اقساقالدارى جاڭا مەشىتكە اپارار جەر ءۇستى وتكەلىن سالۋ ماسەلەسى بويىنشا ماعان بىرنەشە رەت جۇگىنگەن ەدى. جۇمىستار اعىمداعى جىلدىڭ 6 قىركۇيەگىندە باستالدى. جوبانى قولعا العان "سەمەي-وتدەلستروي" ج ش س، مەردىگەر "AGM Service" ج ش س، - دەيدى سەمەي قالاسىنىڭ اكىمى باقىتجان باياحمەتوۆ. - كوپىردىڭ ۇزىندىعى - 48 مەتر، ەنى - 2،5 مەتر، بيىكتىگى - 5،3 مەتر. ايتا كەتۋ كەرەك، جەر ءۇستى وتكەلى مەشىتتىڭ ساۋلەتتىك كەلبەتىنە وتە جاقسى سايكەس كەلەدى. ءبىراق ەڭ باستىسى، ارينە، ول ادامداردىڭ قاۋىپسىزدىگى. قالالىقتارعا مەشىتكە ءوتۋ ەندى الدەقايدا وڭاي.
جەرۇستى جاياۋ جۇرگىنشىلەر وتكەلى اۆتوموبيل جولىنا كەدەرگى كەلتىرمەيدى، جاياۋ جۇرگىنشىلەر ءۇشىن، ونىڭ ىشىندە مەكتەپ وقۋشىلارى ءۇشىن ءقاۋىپسىز ءوتۋدى قامتاماسىز ەتەتىنى انىق. سونداي-اق، قالانىڭ ەستەتيكالىق كەلبەتى جاقسارىپ، قالا تۇرعىندارى ءۇشىن قولايلى ورتانى قامتاماسىز ەتەدى.
- جاڭا مەشىتكە سالىنعالى بارىپ كورمەپپىن. جولدى كەسىپ وتكەنگە نەمەسە تەمىر جولدان وتە شىققانعا جۇرەكسىنەتىنمىن. ەندى مەشىتكە جەتۋ قيىندىق تۋدىرمايتىن بولدى، - دەيدى سەمەيلىك اسەل وڭعارسىن.
وسى ورايدا سەمەي تۇرعىنى داۋلەت دەگەلەن دەگەن ازامات توميريس اۋدانىنداعى وسىنداي وقىس جول بولىگىنە اكىمدىك نازار اۋدارسا دەگەن تىلەك ءبىلدىردى. ويتكەنى بۇل اۋداندا ءۇش مەكتەپ پەن ەكى بالاباقشا بار كورىنەدى. بالالار وسى ءقاۋىپتى جولدى كەسىپ وتۋگە ءماجبۇر ەكەن.
