Esterińizge sala ketsek, byltyr Ulystyń uly kúni Semeı qalasynda on jyldan astam ýaqyt kútken jańa meshit ashylǵan edi. 2008 jyly bastalǵan isti aqyry 2018 jyly belgili kásipker Dýlat Tastekeev qolǵa alyp, óz qarajatymen jumysty qaıta jandandyrǵan kásipker bastalǵan isti sońyna deıin jetkizgen. Meshit salynǵanymen oǵan aparar jol joq edi. Qala aqsaqaldary birneshe ret osy máseleni kótergen bolatyn.
- Turǵyndar, sonyń ishinde qala aqsaqaldary jańa meshitke aparar jer ústi ótkelin salý máselesi boıynsha maǵan birneshe ret júgingen edi. Jumystar aǵymdaǵy jyldyń 6 qyrkúıeginde bastaldy. Jobany qolǵa alǵan "Semeı-OtdelStroı" JSHS, merdiger "AGM Service" JSHS, - deıdi Semeı qalasynyń ákimi Baqytjan Baıahmetov. - Kópirdiń uzyndyǵy - 48 metr, eni - 2,5 metr, bıiktigi - 5,3 metr. Aıta ketý kerek, jer ústi ótkeli meshittiń sáýlettik kelbetine óte jaqsy sáıkes keledi. Biraq eń bastysy, árıne, ol adamdardyń qaýipsizdigi. Qalalyqtarǵa meshitke ótý endi áldeqaıda ońaı.
Jerústi jaıaý júrginshiler ótkeli avtomobıl jolyna kedergi keltirmeıdi, jaıaý júrginshiler úshin, onyń ishinde mektep oqýshylary úshin qaýipsiz ótýdi qamtamasyz etetini anyq. Sondaı-aq, qalanyń estetıkalyq kelbeti jaqsaryp, qala turǵyndary úshin qolaıly ortany qamtamasyz etedi.
- Jańa meshitke salynǵaly baryp kórmeppin. Joldy kesip ótkenge nemese temir joldan óte shyqqanǵa júreksinetinmin. Endi meshitke jetý qıyndyq týdyrmaıtyn boldy, - deıdi semeılik Ásel Ońǵarsyn.
Osy oraıda Semeı turǵyny Dáýlet Degelen degen azamat Tomırıs aýdanyndaǵy osyndaı oqys jol bóligine ákimdik nazar aýdarsa degen tilek bildirdi. Óıtkeni bul aýdanda úsh mektep pen eki balabaqsha bar kórinedi. Balalar osy qaýipti joldy kesip ótýge májbúr eken.
