جەكە كاسىپكەر ساردار ۋسمانوۆ جاڭا سەحتى ىسكە قوسۋعا ءوز ەسەبىنەن 20 ملن تەڭگە قاراجات جۇمساعان. سەح جۇمىسىن بيىل مامىر ايىنىڭ سوڭىندا باستادى. قاجەتتى قۇرال-جابدىقتار مەن جيھازدارمەن قامتىلعان.
بۇگىنگى تاڭدا سەحتا 18 مىڭ دانا جازدىق جانە 10 مىڭ دانا قىسقى اسكەري كيىمگە تاپسىرىس الىپ، ءپىشىپ، تىگۋ جۇمىستارىن باستاپ كەتكەن. كاسىپورىندا 30 ادام تۇراقتى جۇمىسپەن قامتىلعان. تىگىنشىلەردىڭ ورتاشا ايلىق-جالاقىلارى 80-90 مىڭ تەڭگەنى قۇرايدى.
سايرام اۋدانىندا ءساتتى جۇزەگە اسىرىلىپ جاتقان جوبانىڭ ءبىرى – «اۋىل – ەل تىرەگى». ونكۇندىك اياسىندا مانكەنت اۋىلدىق وكرۋگىندە ءبىرقاتار جۇمىستار اتقارىلدى.
اتاپ ايتقاندا، 2 رەت سەنبىلىك وتكىزىلىپ، 15 شاقىرىم كوشە بويلارى جانە 6 شاقىرىم اياق جولدارى تازارتىلىپ، قۋراعان شوپتەر ورىلدى.
وكرۋگ اۋماعىنداعى 3 زيارات (مازارات) ورىندارىندا اباتتاندىرۋ جۇمىستارى جۇرگىزىلدى. سونىمەن قاتار كوشەلەردە 360 ءتۇپ دەكوراتيۆتى اعاش اكتەلسە، 250 باعانا سىرلانىپ، اكتەلگەن.
توزىعى جەتكەن 25 ەلەكتر باعاناسى اۋىستىرىلدى، 4 دانا ترانسفورماتور سىرلانىپ، قورشالدى. تازالىق جۇمىستارىنا قاجەتتى تەحنيكالار جۇمىلدىرىلىپ، 45 تەكشە مەتر كولەمىندە كۇل-قوقىستار شىعارىلدى. مەملەكەتتىك مەكەمەلەر تاراپىنان جانە اسار جولىمەن حالىقتى تارتا وتىرىپ، 7 تەحنيكانىڭ كومەگىمەن 1،5 شاقىرىم كانال مەحانيكالىق تازالاۋدان وتكىزىلگەن. ازاماتتىق قوعامدى جانە جەرگىلىكتى ءوزىن-وزى باسقارۋدى جەتىلدىرەتىن بۇل جوبانى تۇرعىندار دا جوعارى باعالاپ وتىر.
