الماتى قالاسىندا بيىل اشىلعان №227 مەكتەپتٸڭ وقىتۋ تٸلٸنە قاتىستى ەلەۋمەتتٸك جەلٸلەردە تاراعان اقپارات تۇرعىندار اراسىندا الاڭداۋشىلىق تۋعىزدى. كەيبٸر اتا-انالار مەكتەپتٸڭ ارالاس فورماتقا اۋىسۋى مٷمكٸن ەكەنٸ تۋرالى قاۋەسەتكە بايلانىستى پٸكٸر بٸلدٸرٸپ, ونىڭ قازاق تٸلٸندە بٸلٸم بەرەتٸن بٸلٸم ورداسى بولىپ قالۋىن تالاپ ەتتٸ, دەپ حابارلايدى dalanews.kz.
Threads ەلەۋمەتتٸك جەلٸسٸندە التىن City تۇرعىندارىنىڭ بٸرٸ №227 مەكتەپتٸڭ ارالاس وقىتۋ فورماتىنا كٶشۋٸنە قارسىلىق بٸلدٸرٸپ, جازبا جارييالاعان.
«بٸزدٸڭ اۋدان بويىنشا ٶزٸ ەكٸ-اق قازاق تٸلدٸ مەكتەپ بار. بالامىز قازاق تٸلدٸ مەكتەپكە وقيدى دەپ مەدەۋ اۋدانىنداعى №220 مەكتەپتەن شىعارىپ, وسى مەكتەپكە ورنالاستىردىق. مەكتەبٸمٸزدٸڭ ارالاس بولۋىنا قارسىمىز», – دەپ جازدى تۇرعىن.
اتالعان مەسەلەگە بايلانىستى الماتى قالاسى بٸلٸم باسقارماسى رەسمي تٷسٸنٸكتەمە بەردٸ.
«№227 مەكتەپ باستاپقىدا مەملەكەتتٸك تٸلدە بٸلٸم بەرەتٸن مەكتەپ رەتٸندە اشىلعان. مەكتەپتٸڭ وقىتۋ تٸلٸ ونىڭ جارعىسى مەن تيٸستٸ رەسمي قۇجاتتارىندا ناقتى بەلگٸلەنگەن. قازٸرگٸ ۋاقىتتا №227 مەكتەپتٸ ارالاس وقىتۋ فورماتىنا اۋىستىرۋ مەسەلەسٸ قاراستىرىلىپ جاتقان جوق. مەكتەپ مەملەكەتتٸك تٸلدە بٸلٸم بەرۋدٸ جالعاستىرادى. اتا-انالاردى تەك رەسمي اقپاراتقا سٷيەنۋگە شاقىرامىز», – دەلٸنگەن باسقارما جاۋابىندا.
ايتا كەتەيٸك, سوڭعى ۋاقىتتا الماتىداعى جاڭا مەكتەپتەردٸڭ وقىتۋ تٸلٸنە قاتىستى مەسەلەلەر قوعامدا قىزۋ تالقىلانىپ كەلەدٸ.
بىلتىر قالاداعى №224 مەكتەپ تٶڭٸرەگٸندە دە داۋ تۋىنداعان بولاتىن. تۇرعىندار مەن اتا-انالار باستاپقىدا قازاق تٸلٸندە بٸلٸم بەرەتٸن مەكتەپ رەتٸندە جوسپارلانعان بٸلٸم ورداسىنىڭ ارالاس مەكتەپ بولىپ اشىلۋى مٷمكٸن ەكەنٸنە الاڭداۋشىلىق بٸلدٸرٸپ, بٸرنەشە رەت ەكٸمدٸككە جينالدى. سونداي-اق مەملەكەت باسشىسى قاسىم-جومارت توقاەۆقا ٷندەۋ جولداپ, مەكتەپتٸڭ قازاق تٸلٸندە بٸلٸم بەرۋٸن ساقتاپ قالۋدى سۇراعان.
قوعامدىق تالقىلاۋلار مەن تۇرعىنداردىڭ تالاپتارىنان كەيٸن №224 مەكتەپ قازاق تٸلٸندە بٸلٸم بەرەتٸن مەكتەپ رەتٸندە جۇمىسىن باستادى. بۇل تۋرالى قوعام بەلسەندٸلەرٸ ەلەۋمەتتٸك جەلٸلەردە حابارلاعان بولاتىن.
