Almaty qalasynda biyl ashylǵan №227 mekteptiń oqytý tiline qatysty áleýmettik jelilerde taraǵan aqparat turǵyndar arasynda alańdaýshylyq týǵyzdy. Keibir ata-analar mekteptiń aralas formatqa aýysýy múmkin ekeni týraly qaýesetke bailanysty pikir bildirip, onyń qazaq tilinde bilim beretin bilim ordasy bolyp qalýyn talap etti, dep habarlaidy dalanews.kz.
Threads áleýmettik jelisinde Altyn City turǵyndarynyń biri №227 mekteptiń aralas oqytý formatyna kóshýine qarsylyq bildirip, jazba jariialaǵan.
«Bizdiń aýdan boiynsha ózi eki-aq qazaq tildi mektep bar. Balamyz qazaq tildi mektepke oqidy dep Medeý aýdanyndaǵy №220 mektepten shyǵaryp, osy mektepke ornalastyrdyq. Mektebimizdiń aralas bolýyna qarsymyz», – dep jazdy turǵyn.
Atalǵan máselege bailanysty Almaty qalasy Bilim basqarmasy resmi túsinikteme berdi.
«№227 mektep bastapqyda memlekettik tilde bilim beretin mektep retinde ashylǵan. Mekteptiń oqytý tili onyń Jarǵysy men tiisti resmi qujattarynda naqty belgilengen. Qazirgi ýaqytta №227 mektepti aralas oqytý formatyna aýystyrý máselesi qarastyrylyp jatqan joq. Mektep memlekettik tilde bilim berýdi jalǵastyrady. Ata-analardy tek resmi aqparatqa súienýge shaqyramyz», – delingen basqarma jaýabynda.
Aita keteiik, sońǵy ýaqytta Almatydaǵy jańa mektepterdiń oqytý tiline qatysty máseleler qoǵamda qyzý talqylanyp keledi.
Byltyr qaladaǵy №224 mektep tóńireginde de daý týyndaǵan bolatyn. Turǵyndar men ata-analar bastapqyda qazaq tilinde bilim beretin mektep retinde josparlanǵan bilim ordasynyń aralas mektep bolyp ashylýy múmkin ekenine alańdaýshylyq bildirip, birneshe ret ákimdikke jinaldy. Sondai-aq Memleket basshysy Qasym-Jomart Toqaevqa úndeý joldap, mekteptiń qazaq tilinde bilim berýin saqtap qalýdy suraǵan.
Qoǵamdyq talqylaýlar men turǵyndardyń talaptarynan keiin №224 mektep qazaq tilinde bilim beretin mektep retinde jumysyn bastady. Bul týraly qoǵam belsendileri áleýmettik jelilerde habarlaǵan bolatyn.
