جۋىردا تۇركىستان وبلىسىندا جاڭادان ساۋران اۋدانى قۇرىلىپ، اكىمشىلىك اۋماعى بەكىتىلىپ، اكىمى تاعايىندالعان بولاتىن. ال بۇگىن، ياعني، 3 شىلدەدە ساۋران اۋدانىندا «Nur Otan» پارتياسىنىڭ فيليالى قۇرىلىپ، ونىڭ ەڭ العاشقى كونفەرەنسياسى ونلاين تۇردە ءوتتى. ماڭىزدى جيىنعا «Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى، فراكسيا جەتەكشىسى بەيسەن تاجىبايەۆ قاتىستى، – دەپ حابارلايدى Dalanews.kz «Nur Otan» پارتياسى تۇركىستان وبلىستىق فيليالىنىڭ باسپا ءسوز قىزمەتىنە سىلتەمە جاساپ.

كونفەرەنسيانىڭ كۇن تارتىبىندە 3 ماسەلە تالقىلاندى. ءبىرىنشى ماسەلە بويىنشا  «Nur Otan» پارتياسىنىڭ ساۋران اۋداندىق فيليالىنىڭ ءتوراعاسى بولىپ اۋدان اكىمى رىسبەكوۆ عاني قۇرماش ۇلى سايلاندى. ال اۋداندىق فيليال ءتوراعاسىنىڭ ءبىرىنشى ورىنباسارى بولىپ اسىلبەكوۆ ساعىنبەك جاقسىبەك ۇلى جۇمىسقا كىرىستى.

كۇن تارتىبىندەگى ەكىنشى ماسەلە بويىنشا «Nur Otan» پارتياسى ساۋران اۋداندىق فيليالى ساياسي كەڭەسىنىڭ قۇرامى تولىق بەكىتىلدى. سونىمەن بىرگە ساياسي كەڭەس بيۋروسىنىڭ مۇشەلەرى دە دەلەگاتتار تاراپىنان قولداۋ تاۋىپ، ءبىراۋىزدان سايلاندى. بىردەن ىسكە كىرىسكەن ساۋران اۋداندىق ساياسي كەڭەس بيۋروسى العاشقى وتىرىسىن وتكىزدى.

كۇن تارتىبىندەگى ءۇشىنشى ماسەلە دە تولىق تالقىلاندى. 25 شىلدەدە ەلىمىزدە تۇڭعىش رەت وتەتىن اۋىل اكىمدەرىن سايلاۋعا ساۋران اۋدانى بويىنشا «Nur Otan» پارتياسىنان ۇمىتكەرلەر ۇسىنىلىپ، دەلەگاتتار تاراپىنان داۋىس بەرىلدى. ۇمىتكەرلەرگە داۋىس بەرۋ قورتىندىسى جايلى ساناق كوميسسياسىنىڭ ءتوراعاسى گۇلباعيلا قارجاۋوۆا حابارلاما جاسادى. وسىلايشا، كۇن تارتىبىندەگى ءۇش ماسەلە دە قارالىپ، كونفەرەنسيانىڭ قاۋلىسى قابىلداندى.

«Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى، فراكسيا جەتەكشىسى بەيسەن تاجىبايەۆ ساۋران اۋدانىندا قۇرىلعان پارتيا فيليالى مەن ونىڭ ءتوراعاسىنىڭ جۇمىسىنا ساتتىلىك تىلەپ، پارتيانىڭ سايلاۋالدى باعدارلاماسىن ورىنداۋ جونىندەگى جول كارتاسىن جۇيەلى تۇردە جۇزەگە اسىرۋ كەرەكتىگىن جەتكىزدى.

– ساۋران – الەۋەتى زور اۋدان. مۇندا ءتۋريزمدى، اۋىل شارۋاشىلىعىن، كاسىپكەرلىكتى دامىتۋعا مۇمكىندىك بار. تۇركىستانعا جاقىن ورنالاسۋى دا بۇل اۋماقتىڭ ەكونوميكالىق دەڭگەيىن كوتەرۋگە سەرپىن بەرەدى. فيليال تىزگىنىن قولعا العان عاني قۇرماش ۇلى – ىسكەر ءارى وسى ءوڭىردىڭ جاعدايىن وتە جاقسى بىلەتىن ازامات. جەتەكشى پارتيامەن بىرگە العا قويعان مىندەتتەردى، ەل الدىنداعى جاۋاپكەرشىلىك پەن سەنىمدى جوعارى ۇستايتىندارىڭىزعا سەنىمىم مول، – دەدى ول.

ساۋران اۋدانىنىڭ اكىمى، «Nur Otan» پارتياسىنىڭ ساۋران اۋداندىق فيليالىنىڭ ءتوراعاسى عاني رىسبەكوۆ سايلاۋالدى باعدارلاماداعى جوسپارلاردى ۋاقتىلى ءارى ساپالى ورىنداۋعا كۇش سالاتىنىن ايتا كەلە، پارتيالاستاردى وتانشىلدىقپەن، شىن نيەتپەن جۇمىس ىستەۋگە شاقىردى.

ساۋران اۋدانى ق ر پرەزيدەنتى قاسىم-جومارت توقايەۆتىڭ جارلىعىمەن 2021 جىلى  12 ناۋرىزدا  قۇرىلدى. جاڭادان قۇرىلعان اۋدان حالقىنىڭ سانى 100 مىڭنان اسادى. اكىمشىلىك ورتالىعى – شورناق اۋىلى.