Saýran aýdanynda Nur Otan partiiasynyń filialy ashylyp, tóraǵasy sailandy
Konferentsiianyń kún tártibinde 3 másele talqylandy. Birinshi másele boiynsha «Nur Otan» partiiasynyń Saýran aýdandyq filialynyń tóraǵasy bolyp aýdan ákimi Rysbekov Ǵani Qurmashuly sailandy. Al aýdandyq filial tóraǵasynyń birinshi orynbasary bolyp Asylbekov Saǵynbek Jaqsybekuly jumysqa kiristi.
Kún tártibindegi ekinshi másele boiynsha «Nur Otan» partiiasy Saýran aýdandyq filialy Saiasi keńesiniń quramy tolyq bekitildi. Sonymen birge Saiasi keńes biýrosynyń músheleri de delegattar tarapynan qoldaý taýyp, biraýyzdan sailandy. Birden iske kirisken Saýran aýdandyq Saiasi keńes biýrosy alǵashqy otyrysyn ótkizdi.
Kún tártibindegi úshinshi másele de tolyq talqylandy. 25 shildede elimizde tuńǵysh ret ótetin aýyl ákimderin sailaýǵa Saýran aýdany boiynsha «Nur Otan» partiiasynan úmitkerler usynylyp, delegattar tarapynan daýys berildi. Úmitkerlerge daýys berý qortyndysy jaily sanaq komissiiasynyń tóraǵasy Gúlbaǵila Qarjaýova habarlama jasady. Osylaisha, kún tártibindegi úsh másele de qaralyp, konferentsiianyń qaýlysy qabyldandy.
«Nur Otan» partiiasy Túrkistan oblystyq filialy tóraǵasynyń birinshi orynbasary, fraktsiia jetekshisi Beisen Tájibaev Saýran aýdanynda qurylǵan partiia filialy men onyń tóraǵasynyń jumysyna sáttilik tilep, partiianyń sailaýaldy baǵdarlamasyn oryndaý jónindegi Jol kartasyn júieli túrde júzege asyrý kerektigin jetkizdi.
– Saýran – áleýeti zor aýdan. Munda týrizmdi, aýyl sharýashylyǵyn, kásipkerlikti damytýǵa múmkindik bar. Túrkistanǵa jaqyn ornalasýy da bul aýmaqtyń ekonomikalyq deńgeiin kóterýge serpin beredi. Filial tizginin qolǵa alǵan Ǵani Qurmashuly – isker ári osy óńirdiń jaǵdaiyn óte jaqsy biletin azamat. Jetekshi partiiamen birge alǵa qoiǵan mindetterdi, el aldyndaǵy jaýapkershilik pen senimdi joǵary ustaityndaryńyzǵa senimim mol, – dedi ol.
Saýran aýdanynyń ákimi, «Nur Otan» partiiasynyń Saýran aýdandyq filialynyń tóraǵasy Ǵani Rysbekov sailaýaldy baǵdarlamadaǵy josparlardy ýaqtyly ári sapaly oryndaýǵa kúsh salatynyn aita kele, partiialastardy otanshyldyqpen, shyn nietpen jumys isteýge shaqyrdy.
Saýran aýdany QR Prezidenti Qasym-Jomart Toqaevtyń Jarlyǵymen 2021 jyly 12 naýryzda quryldy. Jańadan qurylǵan aýdan halqynyń sany 100 myńnan asady. Ákimshilik ortalyǵy – Shornaq aýyly.
