بەردىبەك ساپاربايەۆ وبلىس ورتالىعى وسكەمەن، سەمەي جانە التاي قالالارىندا بولىپ، الەۋمەتتىك نىسانداردى ارالادى.
سونىمەن قاتار ساپار بارىسىنىڭ باستى ماقساتى – وبلىس جۇرتشىلىعىمەن پرەزيدەنت جولداۋىندا ايتىلعان نەگىزگى مىندەتتەردى تالقىلاپ، باستى ماقساتتارىن جەتكىزۋ. ق ر پرەمەر-مينيسترىنىڭ ورىنباسارى بەردىبەك ساپاربايەۆ باستاعان ۇكىمەتتىك توپ "سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى" اتتى ق ر پرەزيدەنتى قاسىم-جومارت توقايەۆتىڭ جولداۋىنىڭ نەگىزگى باعىتتارىن ءتۇسىندىردى.
وسى رەتتە سەمەي قالاسىندا وتكەن اكتيۆتە سەمەيلىكتەر جوعارى بەلسەندىلىك تانىتىپ، كوپبالالى انالار مەملەكەت تاراپىنان كورسەتىلىپ جاتقان الەۋمەتتىك كومەك پەن قولداۋعا ءوز ريزاشىلىقتارىن ءبىلدىردى.
بەردىبەك ساپاربايەۆ ءوز بايانداماسىندا اتاۋلى الەۋمەتتىك كومەك تاعايىنداۋ، جۇمىسپەن قامتۋ، ساپالى ءبىلىم بەرۋ، نەسيە، ەڭبەكاقىنىڭ كوتەرىلۋ ماسەلەلەرىنە جەتە توقتالدى.
بەردىبەك ساپاربايەۆ سەمەي مەن التاي قالالارىنداعى ءبىرقاتار مەديسينالىق ورتالىقتاردا بولىپ، وبلىستىڭ وزىق مەديسينا سالاسىنا ءوز باعاسىن بەردى.
التاي قالاسىنداعى ينسۋلتتىك ورتالىقتىڭ جۇمىسىمەن تانىسقان بەردىبەك ماشبەك ۇلى مۇنداعى دارىگەرلەردىڭ جالاقىسىنا باسا نازار اۋداردى.
- قاي كەزدە، اۋدان ورتالىعىنىڭ دارىگەرلەرى انگلياعا بارىپ تاجىريبەلەرىن شىڭداپ ەدى، قاي كەزدە اۋدان ورتالىعىندا كوپيۋتەرلىك توموگرافيا بولىپ ەدى؟ دەنساۋلىق جانە باسقا دا سالالار بويىنشا شقو جاساپ جاتقان جۇمىستى ءقازىر ەشقانداي وبلىس جاساي الىپ وتىرعان جوق، - دەدى بەردىبەك ساپاربايەۆ.
سونىمەن قاتار ق ر پرەمەر-مينيسترىنىڭ ورىنباسارى بەردىبەك ساپاربايەۆ وسكەمەندەگى «روبوتتاندىرىلعان حيرۋرگيا» ورتالىعىنىڭ جۇمىسىمەن تانىستى.
ورتالىقتاعى «روبوتتاندىرىلعان حيرۋرگيا» كابينەتىن تولىق جابدىقتاۋعا 1 ميلليارد 900 مىڭ تەڭگە قاراجات جۇمسالعان ەكەن. مامانداردىڭ تۇسىندىرۋىنشە، حيرۋرگ روبوتتى قاشىقتىقتان باسقارادى.
ال كومەكشىلەرى مەن مەدبيكەلەر مانيپۋلياتورلاردى ءتيىستى جەرلەرگە ورناتادى، قاجەتتى ينسترۋمەنتتەردى الماستىرىپ وتىرادى. بۇل جەردە بارلىق جۇمىس اسقان دالدىكپەن، كاسىبي مۇقياتتىلىقپەن جاسالاتىنى ايتپاسا دا تۇسىنىكتى.
ۇكىمەت باسشىسىنىڭ ورىنباسارى ورتالىقتىڭ جۇمىسى مەن اتالمىش كابينەتتىڭ جابدىقتالۋىنا جوعارى باعا بەردى.
سونداي-اق بەردىبەك ماشبەك ۇلى ءسوز اراسىندا «مۇزداي قارۋلانعان» مۇنداي امبەباپ كابينەت وسكەمەننەن بولەك نۇر-سۇلتان قالاسىندا عانا بار ەكەنىن اتاپ ءوتتى.
شىعىسقازاقستاندىقتار بەردىبەك ساپارباەتى جىلى شىرايمەن قارسى الىپ، وبلىس اقساقالدارى مەن زيالى قاۋىمى ريزاشىلىقتارىن ءبىلدىرىپ جاتتى. جالپى، ايماقتا الەۋمەتتىك كومەك كورسەتۋ جۇمىسى العا قويىلعان، بيىلدىڭ وزىندە 300-دەن استام كوپبالالى وتباسىلار باسپانامەن قامتىلدى.
اسەم جۇماعالي قىزى
