Berdibek Saparbaev oblys ortalyǵy Óskemen, Semeı jáne Altaı qalalarynda bolyp, áleýmettik nysandardy aralady.
Sonymen qatar sapar barysynyń basty maqsaty – oblys jurtshylyǵymen Prezıdent Joldaýynda aıtylǵan negizgi mindetterdi talqylap, basty maqsattaryn jetkizý. QR Premer-mınıstriniń orynbasary Berdibek Saparbaev bastaǵan úkimettik top "Syndarly qoǵamdyq dıalog - Qazaqstannyń turaqtylyǵy men órkendeýiniń negizi" atty QR Prezıdenti Qasym-Jomart Toqaevtyń Joldaýynyń negizgi baǵyttaryn túsindirdi.
Osy rette Semeı qalasynda ótken aktıvte semeılikter joǵary belsendilik tanytyp, kópbalaly analar memleket tarapynan kórsetilip jatqan áleýmettik kómek pen qoldaýǵa óz rızashylyqtaryn bildirdi.
Berdibek Saparbaev óz baıandamasynda ataýly áleýmettik kómek taǵaıyndaý, jumyspen qamtý, sapaly bilim berý, nesıe, eńbekaqynyń kóterilý máselelerine jete toqtaldy.
Berdibek Saparbaev Semeı men Altaı qalalaryndaǵy birqatar medısınalyq ortalyqtarda bolyp, oblystyń ozyq medısına salasyna óz baǵasyn berdi.
Altaı qalasyndaǵy Insýlttik ortalyqtyń jumysymen tanysqan Berdibek Máshbekuly mundaǵy dárigerlerdiń jalaqysyna basa nazar aýdardy.
- Qaı kezde, aýdan ortalyǵynyń dárigerleri Anglıaǵa baryp tájirıbelerin shyńdap edi, qaı kezde aýdan ortalyǵynda kopúterlik tomografıa bolyp edi? Densaýlyq jáne basqa da salalar boıynsha SHQO jasap jatqan jumysty qazir eshqandaı oblys jasaı alyp otyrǵan joq, - dedi Berdibek Saparbaev.
Sonymen qatar QR Premer-mınıstriniń orynbasary Berdibek Saparbaev Óskemendegi «Robottandyrylǵan hırýrgıa» ortalyǵynyń jumysymen tanysty.
Ortalyqtaǵy «Robottandyrylǵan hırýrgıa» kabınetin tolyq jabdyqtaýǵa 1 mıllıard 900 myń teńge qarajat jumsalǵan eken. Mamandardyń túsindirýinshe, hırýrg robotty qashyqtyqtan basqarady.
Al kómekshileri men medbıkeler manıpýlátorlardy tıisti jerlerge ornatady, qajetti ınstrýmentterdi almastyryp otyrady. Bul jerde barlyq jumys asqan dáldikpen, kásibı muqıattylyqpen jasalatyny aıtpasa da túsinikti.
Úkimet basshysynyń orynbasary ortalyqtyń jumysy men atalmysh kabınettiń jabdyqtalýyna joǵary baǵa berdi.
Sondaı-aq Berdibek Máshbekuly sóz arasynda «muzdaı qarýlanǵan» mundaı ámbebap kabınet Óskemennen bólek Nur-Sultan qalasynda ǵana bar ekenin atap ótti.
Shyǵysqazaqstandyqtar Berdibek Saparbaety jyly shyraımen qarsy alyp, oblys aqsaqaldary men zıaly qaýymy rızashylyqtaryn bildirip jatty. Jalpy, aımaqta áleýmettik kómek kórsetý jumysy alǵa qoıylǵan, bıyldyń ózinde 300-den astam kópbalaly otbasylar baspanamen qamtyldy.
Ásem Jumaǵalıqyzy
