ءماسليحاتتىڭ كەزەكتەن تىس سەسسياسىندا شىعىس قازاقستان وبلىستىق ءماسليحاتتىڭ سەسسياسى بۇعان دەيىن بەكىتىلگەن 2021 جىلعا ارنالعان بيۋدجەتكە وزگەرىستەر ەنگىزىلدى.
شقو ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ساۋلە ۋلاقوۆانىڭ ايتۋىنشا، وزگەرىستەر جىل باسىنا قالىپتاسقان بوس قالدىقتاردى بولۋمەن، سونداي-اق وبلىستىق بيۋدجەتتىك باعدارلامالار اكىمشىلەرىنىڭ قاراجاتىن باسىم باعىتتارعا قايتا بولۋمەن بايلانىستى. ونىڭ ايتۋىنشا، قوسىمشا وبلىستىق قاراجات ايماق ءۇشىن ماڭىزدى ماسەلەلەردى شەشۋگە جۇمسالادى. مىسالى، «شىعىس – ادالدىق الاڭى» جوباسى اياسىندا 10 اۋىلدىق ەلدى مەكەندى «اشىق اكىمدىك» فورماتىندا قىزمەت كورسەتۋدىڭ سەرۆيستىك مودەلىنە كوشۋگە 38،9 ملن تەڭگە ءبولىندى.
– جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى بويىنشا 29،7 ملن تەڭگە كوپبالالى جانە از قامتىلعان وتباسىلارعا الەۋمەتتىك-قۇقىقتىق كومەك كورسەتۋ ءۇشىن مەملەكەتتىك الەۋمەتتىك تاپسىرىستى ورنالاستىرۋعا باعىتتالاتىن بولادى. چەرنوبىل اەس-ىندەگى اپاتتىڭ زارداپتارىن جويۋعا قاتىسۋشىلاردى ەسكە الۋعا ارنالعان مونۋمەنت جاساۋعا 17 ميلليون تەڭگە جۇمسالادى، –دەدى ساۋلە ۇلاقوۆا.
كۇن تارتىبىندە وسكەمەن جانە ريددەر قالالارىنىڭ كەيبىر كوشەلەرىن قايتا اتاۋ، سونداي-اق اۆتوبۋس پاركىن جاڭارتۋ سياقتى باسقا دا ماسەلەلەر قارالدى.
– وبلىس ورتالىعىندا مەندەلەيەۆ كوشەسى تانىمال مەتاللۋرگ، قازاقستان رەسپۋبليكاسى مەملەكەتتىك سىيلىقتارىنىڭ لاۋرەاتى، قازاقستاننىڭ ەڭبەك ەرى باعدات شاياحمەتوۆتىڭ ەسىمىمەن اتالادى، ول دا «وتمك» اق باسشىلىعى كەزىندە وتاندىق مەتاللۋرگيانى دامىتۋعا ەلەۋلى ۇلەس قوستى، – دەدى تىلدەردى دامىتۋ باسقارماسىنىڭ باسشىسى روزا تولەمىسوۆا. – ريددەردەگى وستروۆسكيي اتىنداعى ورتالىق كوشەگە اباي داڭعىلى اتاۋى بەرىلدى. اباي ەسىمىمەن اتالاتىن تاعى ءبىر كوشە وسى قالانىڭ تۋماسى، كەڭەس وداعىنىڭ باتىرى سەرگەي گۋليايەۆ كوشەسى دەپ اتالاتىن بولادى.
ايماق باسشىسى دانيال احمەتوۆ بۇل رەتتە عالىم دميتريي مەندەلەيەۆتىڭ ەسىمى جوعالمايتىنىن اتاپ ءوتتى.
– تاعى ءبىر كوشە حيميك-عالىم مەندەلەيەۆتىڭ ەسىمىمەن اتالادى. بارلىق ءىس-شارالار وتكىزىلدى، رەسپۋبليكالىق كوميسسيا ماقۇلدادى. قالالىق ءماسليحاتتىڭ كەلەسى سەسسياسىندا بۇل سۇراق قاراۋعا شىعارىلاتىن بولادى، - دەدى دانيال احمەتوۆ.
ايتا كەتەيىك، وسكەمەن قالاسىندا 93 بىرلىك اۆتوبۋس پاركىن جاڭارتۋ باعىتىندا ءتيىستى جۇمىستار جۇرگىزىلۋدە.
