اتتىڭ قۇلاعىندا ويناعان جەتكىنشەكتەر اقباي اۋىلىنىڭ تۇرعىندارى. بيىلدان باستاپ ساباقتان بوس ۋاقىتتارىندا شەبەرلىكتەرىن شىڭداۋعا كەرەمەت مۇمكىندىك العان ەكەن.
سايرام اۋداندىق سپورت ءبولىمىنىڭ باسشىسى اسقار باۋىرجانوۆتىڭ ايتىپ وتكەنىندەي «رۋحاني جاڭعىرۋ باعدارلاماسى اياسىندا اۋدانداردا ۇلتتىق سپورت تۇرلەرى بويىنشا بولىمدەر اشىلسىن دەگەن «كوكپار» فەدەراسياسى پرەزيدەنتىنىڭ حاتىنا سايكەس ۇلتتىق سپورت تۇرلەرىن بالالارعا دارىپتەۋ ماقساتىندا №3 اۋداندىق بالالار مەن جاسوسپىرىمدەر سپورت مەكتەبىندە ۇلتتىق سپورت تۇرلەرى بويىنشا كوكپار، اۋدارىسپاق، تەڭگە ءىلۋ ءبولىمى اشىلعان.
ال ۇلتتىق سپورت تۇرلەرىنە بالالاردى باۋلۋ جۇمىسىنا بيۋدجەت ەسەبىنەن قارجى قارالعان. بيىل 15 اتتىڭ كۇتىمىنە 8 ملن. تەڭگە جۇمسالىپتى.
كەلەر جىلى سايگۇلىكتەردىڭ قاتارى تولىعادى دەگەن جوسپار بار. ازىرگە جىلقى مالىن جەكە كاسىپكەردەن جالعا الىپ جاتتىققان بالالارعا كەلەشەكتە ۇلتتىق سپورت مەكتەبىن اشۋ دا كوزدەلىپ وتىر.
سايرامدىق جەتكىنشەكتەر تەك ۇلتتىق سپورت تۇرىمەن اينالىسىپ قانا قويماي، الەمدە كەڭ تاراعان فۋتبول ويىنىنىڭ دا قىر — سىرىن مەڭگەرۋدە.
ەكى اي بۇرىن پايدالانۋعا بەرىلگەن سپورت كەشەنى بۇگىندە فۋتبولققۇمار بالالارعا تولى. بولاشاقتا ءتۇرلى ترەناجەرلار ورناتىلادى. اۋدان اكىمدىگى اۋىلداعى از قامتىلعان وتباسىلاردىڭ بالالارى ءۇشىن تەگىن سەكسيا اشۋدى قاراستىرۋدا.
