21 قاراشا كۇنى رۋدنىي قالاسىندا كوشە اتاۋلارىن وزگەرتۋگە ارنالعان تاريحي قوعامدىق تىڭداۋ ءوتتى. Dalanews.kz ءتىلشىسى داۋعا اينالعان ماسەلەگە شولۋ جاسادى.
تىڭدالىمدا قالاداعى يۆان فرانكو كوشەسىن - ءاليا مولداعۇلوۆا، ال 50 لەت وكتيابريا كوشەسىن - دوستىق دەپ وزگەرتۋ ماسەلەسى قارالدى. جيىن كەزىندە رۋدنىي قالاسىنداعى كوشەلەر اتاۋىن وزگەرتۋگە 14 دەپۋتاتتىڭ 12ء-سى داۋىس بەردى. "نگ" مالىمەتىنشە، دەپۋتات ازامات ىسقاقوۆ داۋىس بەرمەگەن، سەبەبى ول ءماسليحات كوميسسياسىنىڭ تۇراقتى مۇشەلىگىندە ەمەس. وسىلايشا قالاداعى كوشەلەر اتاۋىن وزگەرتۋدى 10 دەپۋتات قولداپ، تەك بىرەۋى - "گورنياك" مادەني ويىن-ساۋىق ورتالىعىنىڭ ديرەكتورى ۆالەريي گيرفانوۆ قارسى شىققان.
قوعامدىق تىڭداۋ كەزىندەگى داۋلى وقيعا
رۋدنىي قالاسىنىڭ بەلسەندىسى ءارى جەرگىلىكتى اۆتومەكتەپتىڭ ديرەكتورى ەكاتەرينا كورچاگينا تىڭداۋ كەزىندەگى سوزىمەن قىزۋ تالقىعا ءتۇستى. ول ءوز سوزىندە كەڭەس مەملەكەتىنىڭ «ۇلى ءرولى» تۋرالى بايانداما جاساپ، وسىلايشا كوشە اتاۋلارىنىڭ قازاقشالانۋىنا قارسىلىعىن ءبىلدىردى.
ودان كەيىن ول ءوز-وزىن ۇستاي الماعانداي كورىنىپ، بىردەن «ءبىز بۇل قالانى سىزدەرگە سىيلادىق» دەگەن سياقتى وكتەم اڭگىمەلەرگە كوشتى. ءبىر ساتتە وعان رەگلامەنتتەن اسىپ بارا جاتقانى ەسكەرتىلىپ ەدى، كورچاگينا:
"سەندەردىڭ رەگلامەنتتەرىڭە تۇكىرگەنىم بار!"، - دەپ ايعايلاعان.
ەكاتەرينا كورچاگينا
بۇل سوزدەن كەيىن ابدىراپ قالعان قالالىق ءماسليحاتتىڭ ءتوراعاسى ازامات ىسقاقوۆ پوليسيا شاقىرىپ، وعان قاتىستى ارىز جازدى. پوليسيا كورچاگينانى عيماراتتان كۇشتەپ شىعارىپ جىبەردى.
ارتىنشا ەكاتەرينا كورچاگينا الەۋمەتتىك جەلىدە قورلاۋىن جالعاستىرعان.
"تاعى ءبىر جايت. مەن: “كوشە اتاۋىن وزگەرتكەننەن كەيىن جولدارىمىز جوندەلىپ كەتە مە، ءومىرىمىز جاقسارا ما، جاڭا جۇمىس ورىندارى اشىلا ما، ءبىز ءوزىمىزدى تەڭ ۇستاي باستايمىز با، ال سىزدەردىڭ بالالارىڭىز اينالانى بىلعاۋدى قويا ما؟” دەگەن ەدىم ولار قالاي اشۋلانعانىن كورسەڭىزدەر. ءسىز “بالالار دەپ نەنى مەڭزەپ وتىرسىز؟” دەپ سۇراي باستادى. مەن بۇرىش-بۇرىشقا تۇكىرەتىندەردى عانا ەمەس، تەرەزەدەن قوقىس لاقتىراتىن، ونى پودەزگە شىعارىپ تاستايتىنداردى ايتتىم. بالالاردىڭ ويىن الاڭدارىن سىندىراتىنداردى، ورىن-ورىندى تۇكىرىكتەرىمەن، قابىقتارىمەن، كىر-قوقىستارىمەن لاستايتىن بارلىق شوشقالاردى ايتتىم"، - دەيدى كورچاگينا.
الەۋمەتتىك جەلى قولدانۋشىلارى بەلسەندىنى وسى سوزىنەن كەيىن قاماۋعا الۋدى تالاپ ەتىپ، كەيبىرى e-otinish پورتالى ارقىلى ونىڭ ۇستىنەن ارىز دا جازعان.
جەلىدەگى تالقىلاۋ
بۇل ماسەلە الەۋمەتتىك جەلىدە بىرنەشە كۇننەن بەرى قىزۋ تالقىلانىپ جاتىر. قالادا تۇرعان اراي ەسىمدى تۇرعىننىڭ سوزىنشە، ايماقتا قازاق تىلىنە دەگەن قۇرمەت جوق.
"رۋدنىيدا مەن دە تۇردىم، جۇمىس ىستەدىم. قازاق تىلىنە دەگەن قۇرمەت 0! مۇنى اكىمشىلىك ىشىنەن باستاپ قالا تۇرعىندارىنىڭ كوپشىلىگىنەن بايقادىم. كوشەلەرىنىڭ 90 پايىزى ورىسشا اتالىنعان، ءتىپتى ابايدىڭ اتىندا كوشە جوق. كوشە اتىن اۋىستىرايىق دەسە قالا تۇرعىندارى قول جيناپ كوتەرىلەمىز دەپ شىعادى. 3 قانا قازاق مەكتەبى بار. مادەني وشاقتارىندا دا كوبىنە قىزمەت ەتەتىندەر ورىس ۇلتىنىڭ ازاماتتارى. قيىن جاعداي. وزگەرەتىنىنە كۇمانىم بار… ".
ەرنۇر كەنجەبەكوۆ ەسىمدى تاعى ءبىر قازاقستاندىقتىڭ سوزىنشە، كوشەلەرگە قازاقى اتاۋلار بەرۋ - رۋحاني تاۋەلسىزدىگىمىزدى ايقىندايتىن ۇلكەن قادام ەكەنىن اتاپ ءوتتى.
"قازاق ءتىلىنىڭ مارتەبەسىن كوتەرۋ - ەلدىگىمىزدىڭ ەڭ ماڭىزدى تىرەكتەرىنىڭ ءبىرى. رۋدنىي قالاسىنىڭ كوشەلەرىنە، ءتىپتى قالا اتاۋىنىڭ وزىنە قازاقى اتاۋلار بەرۋ - رۋحاني تاۋەلسىزدىگىمىزدى ايقىندايتىن ۇلكەن قادام بولار ەدى. بۇل ءوڭىردىڭ مادەنيەتىنە، تاريحىنا جاناشىرلىق تانىتىپ، قازاق رۋحانياتى ءۇشىن ايانباي ەڭبەك ەتكەن وزبەكالى اعامىزدىڭ اماناتىنا دا ساي كەلەدى. ءتىلىمىزدى قۇرمەتتەۋ، جەرىمىزدىڭ اتاۋىن تۇگەندەۋ - ۇرپاق الدىنداعى جاۋاپكەرشىلىك. قازاق ءتىلىن كۇندەلىكتى ومىردە كەڭىنەن قولدانۋعا جازسىن!".
سونىمەن قاتار، قازاقستاندىقتار رۋدنىي قالاسىنداعى كوشەلەردى عانا ەمەس، قالا اتاۋىن دا قازاقىلاندىرۋ كەرەگىن دە جارىسا جازىپ جاتىر. ءبىرى جاڭا اتاۋ رەتىندە كەڭقالانى ۇسىنسا، ەندى ءبىرى سارىباي دەپ اتاۋدى ۇسىنعان.
ايتا كەتەيىك، دەپۋتاتتاردىڭ تىڭدالىمداعى شەشىمى تۇپكىلىكتى شەشىم ەمەس. ەندى قوعامدىق تىڭداۋ ماتەريالدارىن رەسپۋبليكالىق ونوماستيكالىق كوميسسيا ماقۇلداۋى قاجەت.
