2026 جىلدىڭ تامىزىندا رەسەي مۇنايى العاش رەت قازاقستان اۋماعى ارقىلى قىرعىزستانعا ترانزيتپەن تاسىمالداندى. بۇل تۋرالى «قازترانسويل» ۇلتتىق كومپانيياسى حابارلادى, دەپ حابارلايدى dalanews.kz.
كومپانييا مەلٸمەتٸنشە, قىرعىزستانعا العاشقى پارتييا رەتٸندە 35 مىڭ توننا رەسەيلٸك مۇناي جٶنەلتٸلگەن.
«مۇناي قىرعىز رەسپۋبليكاسىنا ماگيسترالدىق مۇناي قۇبىرلارى جٷيەسٸ ارقىلى "قازترانسويل" اق-نىڭ "شاعىر" مۇناي قۇيۋ پۋنكتٸنە دەيٸن جەتكٸزٸلەدٸ. وسى جەردە مۇناي تەمٸرجول تسيستەرنالارىنا قۇيىلىپ, ەرٸ قاراي جٶنەلتٸلەدٸ», – دەلٸنگەن كومپانييا حابارلاماسىندا.
قىرعىزستاندا بٷگٸندە جەتٸ شاعىن مۇناي ٶڭدەۋ زاۋىتى جۇمىس ٸستەيدٸ. ولار شيكٸزاتتى نەگٸزٸنەن كٶرشٸ مەملەكەتتەردەن ساتىپ الادى. ەڭ ٸرٸ كەسٸپورىنداردىڭ قاتارىندا قىتايلىق Shanxi Coal Chemical Industry Group كومپانيياسىنا تيەسٸلٸ, جىلىنا 800 مىڭ تونناعا دەيٸن مۇناي ٶڭدەيتٸن «جۋندا» زاۋىتى جەنە قۋاتى 500 مىڭ توننا بولاتىن «كىرگىز پەترولەۋم كومپاني» بار.
ساراپشىلاردىڭ باعالاۋىنشا, قىرعىزستاننىڭ جىل سايىنعى مۇناي ٶنٸمدەرٸنە سۇرانىسى شامامەن 2 ميلليون توننانى قۇرايدى. بۇعان دەيٸن ەلدەگٸ قاجەتتٸلٸكتٸڭ 90 پايىزعا جۋىعى رەسەيدەن يمپورتتالاتىن مۇناي ٶنٸمدەرٸ ەسەبٸنەن قامتاماسىز ەتٸلٸپ كەلگەن.
الايدا رەسەيدٸڭ مۇناي ٶڭدەۋ سالاسىنداعى بٸرقاتار كەسٸپورىندارى ۇشقىشسىز ۇشۋ اپپاراتتارىنىڭ شابۋىلدارىنان كەيٸن جۇمىسىن قىسقارتۋعا مەجبٷر بولدى. سونىڭ سالدارىنان ەكسپورت كٶلەمٸ ازايىپ, قىرعىزستاندا جانارماي تاپشىلىعى مەن باعانىڭ ٶسۋٸ بايقالعان.
وسى جاعدايدا قازاقستان ارقىلى ۇيىمداستىرىلعان جاڭا ترانزيتتٸك جەتكٸزٸلٸم قىرعىزستاننىڭ مۇناي ٶنٸمدەرٸنە دەگەن سۇرانىسىن قامتاماسىز ەتۋدٸڭ قوسىمشا تەتٸگٸ رەتٸندە قاراستىرىلىپ وتىر.
