2026 jyldyń tamyzynda Resei munaiy alǵash ret Qazaqstan aýmaǵy arqyly Qyrǵyzstanǵa tranzitpen tasymaldandy. Bul týraly «QazTransOil» ulttyq kompaniiasy habarlady, dep habarlaidy dalanews.kz.
Kompaniia málimetinshe, Qyrǵyzstanǵa alǵashqy partiia retinde 35 myń tonna reseilik munai jóneltilgen.
«Munai Qyrǵyz Respýblikasyna magistraldyq munai qubyrlary júiesi arqyly "QazTransOil" AQ-nyń "Shaǵyr" munai quiý pýnktine deiin jetkiziledi. Osy jerde munai temirjol tsisternalaryna quiylyp, ári qarai jóneltiledi», – delingen kompaniia habarlamasynda.
Qyrǵyzstanda búginde jeti shaǵyn munai óńdeý zaýyty jumys isteidi. Olar shikizatty negizinen kórshi memleketterden satyp alady. Eń iri kásiporyndardyń qatarynda qytailyq Shanxi Coal Chemical Industry Group kompaniiasyna tiesili, jylyna 800 myń tonnaǵa deiin munai óńdeitin «Jýnda» zaýyty jáne qýaty 500 myń tonna bolatyn «Kyrgyz Petroleým Kompani» bar.
Sarapshylardyń baǵalaýynsha, Qyrǵyzstannyń jyl saiynǵy munai ónimderine suranysy shamamen 2 million tonnany quraidy. Buǵan deiin eldegi qajettiliktiń 90 paiyzǵa jýyǵy Reseiden importtalatyn munai ónimderi esebinen qamtamasyz etilip kelgen.
Alaida Reseidiń munai óńdeý salasyndaǵy birqatar kásiporyndary ushqyshsyz ushý apparattarynyń shabýyldarynan keiin jumysyn qysqartýǵa májbúr boldy. Sonyń saldarynan eksport kólemi azaiyp, Qyrǵyzstanda janarmai tapshylyǵy men baǵanyń ósýi baiqalǵan.
Osy jaǵdaida Qazaqstan arqyly uiymdastyrylǵan jańa tranzittik jetkizilim Qyrǵyzstannyń munai ónimderine degen suranysyn qamtamasyz etýdiń qosymsha tetigi retinde qarastyrylyp otyr.
