"112 پۋلتىنە قوستاناي وبلىسىنىڭ رۋدنىي قالاسىنداعى تەرەڭدىگى 5 مەتر بولاتىن بۋنكەردى تازارتۋ جۇمىستارىن جۇرگىزۋ بارىسىندا 4 ادامنىڭ ءتۇسىپ، قايتا ورالماعانى تۋرالى حابارلاما كەلىپ ءتۇستى"، - دەيدى ۆەدومستۆو.
"قۇتقارۋشىلار جۇمىسشىلاردىڭ دەنەلەرىن بۋنكەردەن شىعارىپ الدى. ولار قايتىس بولعان. وقيعانىڭ ءمان-جايى انىقتالۋدا"، - دەيدى توتەنشە جاعدايلار دەپارتامەنتى.
قايعىلى وقيعا 5 قازاندا بولعان.
"قازاقمىس" كورپوراسياسى جاعدايعا تۇسىنىكتەمە بەردى. ايتۋلارىنشا، بارلىق جۇمىسشى جەدەل تۇردە ەۆاكۋاسيالانعان.
"زارداپ شەككەندەر جاقىن جەردەگى مەديسينالىق مەكەمەلەرگە جەتكىزىلدى. وكىنىشكە قاراي، ەكى جۇمىسشى قايتىس بولدى.
وقيعانىڭ ءمان-جايى مەن سەبەپتەرى انىقتالۋدا، قايعىلى جاعدايدى تەكسەرۋ ءۇشىن ارنايى كوميسسيا قۇرىلدى.
"قازاقمىس" باسشىلىعى مەن ۇجىمى قازا تاپقانداردىڭ وتباسىلارى مەن جاقىندارىنا قايعىرىپ كوڭىل ايتادى. مارقۇمداردىڭ وتباسىلارىنا قاجەتتى بارلىق كومەك كورسەتىلەدى"، - "قازاقمىس" كورپوراسياسى.
سونىمەن قاتار قاراعاندى وبلىسىندا قارقارالى اۋدانىنداعى دالا ءورتىن ءسوندىرۋ بارىسىندا ءورت ءسوندىرۋشى قازا تاپقان ەدى.
تجم مالىمەتىنشە، وقيعا 6 قازاندا بولعان. № 24 ءورت ءسوندىرۋ ءبولىمىنىڭ اعا ءورت ءسوندىرۋشى-قۇتقارۋشىسى 1991 جىلى تۋعان حالي حايرات كوز جۇمدى. سەرجانت ازاماتتىق قورعاۋ ورگاندارىندا 2014 جىلدان باستاپ جۇمىس ىستەگەن.
"وقيعانىڭ ءمان-جايى انىقتالۋدا. سوتقا دەيىنگى تەرگەۋ باستالدى. ۆەدومستۆونىڭ اپاتتار مەديسيناسى ورتالىعىنىڭ پسيحولوگتارى قايتىس بولعان قىزمەتكەردىڭ تۋىستارىنا قاجەتتى پسيحولوگيالىق كومەك كورسەتىپ جاتىر"، - دەلىنگەن مينيسترلىك تاراتقان اقپاراتتا.
