سالتاناتتى ءىس-شارا قالالىق اكىمدىكتىڭ قولداۋىمەن «جەتىسۋ» ساياباعىندا ءوتتى.
«قوجا» پوۆەسىندەگى كەيىپكەر – ءاربىر ادامنىڭ بالالىق شاعىنىڭ سۇيىكتى كەيىپكەرىنە اينالعان. سول سەبەپتى ەسكەرتكىش حالىقارالىق بالالاردى قورعاۋ كۇنىنە وراي اشىلدى.
ەسكەرتكىش اشۋ يدەياسىنىڭ اۆتورى – جازۋشى جانبولات اۋپبايەۆ. ول قازاق حالقىنىڭ بالا تاربيەلەۋگە ەجەلدەن ەرەكشە ءمان بەرەتىنىن ايتا كەلە، وسى ءبىر بولمىستى بەينەلەيتىن سوقپاقبايەۆ پوۆەسىنىڭ كەيىپكەرىنە مونۋمەنت ورناتۋ جونىندە ويىن ايتتى.
ەسكەرتكىشتىڭ جالپى بيىكتىگى – 183 سم، قولادان جانە گرانيتتەن جاسالعان. ءمۇسىنشى ازامات تالاپحاننىڭ ايتۋىنشا، جۇمىس ءۇش ايعا سوزىلدى.
– ماعان وسى ەسكەرتكىشتى جاساۋ تۋرالى ۇسىنىس تۇسكەن بويدا ءتۇرلى يدەيالاردى ويلاستىرا باستادىم. ەسكەرتكىش ارقىلى باس كەيىپكەردىڭ مىنەزىن كورسەتۋ، شىعارما جەلىسىن جەتكىزۋ وتە ماڭىزدى بولدى. سونىمەن، ءفيلمنىڭ ەستە قالارلىق كورىنىستەرىنىڭ ءبىرىن بەينەلەۋ جونىندە شەشىم قابىلداپ، قوجانىڭ اينا الدىندا وتىرعان ءساتىن كورسەتتىك. جۇمىستا ايتارلىقتاي قيىندىقتار بولعان جوق. ەسكەرتكىش جۇرتقا ۇنايدى دەپ ۇمىتتەنەمىن، – دەدى مونۋمەنت اۆتورى.
جازۋشىنىڭ قىزى سامال سوقپاقبايەۆانىڭ ايتۋىنشا، قوجا ەسىمدى كەيىپكەر ۇلتتىق قاھارمانعا اينالدى.
– بۇل پوۆەست وتە ايگىلى. بۇگىنگە دەيىن جۇرت اراسىندا شىعارمانىڭ ۇزىندىلەرى ايتىلىپ كەلەدى. قوجا ۇجىمدىق، ۇلتتىق بەينەگە اينالدى. كىتاپتىڭ، ءفيلمنىڭ باستى كەيىپكەرى مەيىرىمدىلىگىمەن، باتىلدىعىمەن، ادالدىعىمەن جانە ادىلەتتىلىگىمەن ەرەكشەلەنەدى. قوجا ۇلتتىڭ ءبولمىس-بىتىمىن بويىنا ءسىڭىرىپ وسكەنىن كورۋگە بولادى. سوندىقتان بۇل شىعارمانى حالقىمىز جاقسى كورەدى.
شىعارمانىڭ سوڭى دا جاقسى اياقتالادى. شەبەر جازىلعان شىعارما دارىندى رەجيسسەر ابدۋللا قارساقبايەۆتىڭ قولىنا ءتۇستى. مىقتى جازۋشى مەن دارىندى رەجيسسەردىڭ ەڭبەگىنىڭ ارقاسىندا كينوتۋىندى سول تۇستاعى بۇكىل كەڭەس وداعىن جاۋلاپ الدى.
كوپ ۇزاماي كانن فەستيۆالىنىڭ «بالالارعا ارنالعان ەڭ جاقسى شەتەلدىك فيلم» سىيلىعىنا يە بولدى. بۇل ءبىزدىڭ كينويندۋستريانىڭ وراسان زور جەتىستىگى، ال كارتينا قازاق كينوونەرىنىڭ التىن قورىنا ەندى، – دەدى جازۋشىنىڭ قىزى بەردىبەك سوقپاقبايەۆ.
