مەملەكەت باسشىسى قاسىم-جومارت كەمەل ۇلى توقايەۆ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىندا 2025 جىلدى – «جۇمىسشى ماماندىقتار جىلى» دەپ جاريالادى. وسىعان وراي، ەلىمىزدىڭ بارلىق وڭىرىندە جۇمىسشى ماماندىقتاردى ناسيحاتتاۋ، ەڭبەك ادامىن قولداۋ جانە جۇمىسشى كاسىبىنىڭ مارتەبەسىن ارتتىرۋ باعىتىندا اۋقىمدى شارالار قولعا الىندى. سىر وڭىرىندە دە «جۇمىسشى ماماندىقتار جىلىن» مازمۇندى ءارى جۇيەلى وتكىزۋ ماقساتىندا وبلىس اكىمى نۇرلىبەك نالىبايەۆتىڭ باستاماسىمەن ارنايى ءىس-شارالار جوسپارى بەكىتىلىپ، ءتۇرلى جوبالار جۇزەگە اسىرىلۋدا. بۇگىن قىزىلوردادا «جۇمىسشى جاس ماماندار سلەتى» ءوتتى،- دەپ حابارلايدى Dalanews.kz
اۋقىمدى جيىنعا ەلىمىزدىڭ بىرنەشە وڭىرىنەن، سونداي-اق بارلىق اۋداندار مەن قالالاردان 100-دەن استام جۇمىسشى جاس مامان ارنايى قاتىستى.
پلەنارلىق وتىرىستا وبلىس اكىمىنىڭ ورىنباسارى شاحماردان بايمانوۆ ءسوز سويلەپ، وڭىردە «جۇمىسشى ماماندىقتار جىلىندا» اتقارىلعان جۇمىستارعا توقتالدى.
«جاستار – قوعامنىڭ قوزعاۋشى كۇشى» دەگەن قاعيدا بار. مەملەكەت باسشىسىنىڭ بۇل باستاماسىن اسىرەسە، جاستار قاۋىمى ەرەكشە ىقىلاسپەن قارسى الدى. رەسپۋبليكا كولەمىندە ءتۇرلى فورماتتاعى شارالار ۇيىمداستىرىلىپ، جاستاردى قولداۋعا باعىتتالعان يگى باستامالار قولعا الىنۋدا. قازىرگى تاڭدا، وڭىرىمىزدە 28 كوللەدج بار. ونىڭ 19-دا 45 ماماندىق، 49 بىلىكتىلىك بويىنشا جۇمىسشى كادرلار دايارلانىپ، جالپى 20341 ستۋدەنتتىڭ 4890-ى جۇمىسشى ماماندىعى بويىنشا ءبىلىم الۋدا. وسى جىلى 2 كوللەدج بازاسىندا تىگىن سەحى اشىلدى.
حالىقارالىق بايلانىستى دامىتۋدا كوللەدجدەر تۇركيا، قىرعىزستان، گەرمانيا، رەسەي، لاتۆيا، وزبەكستان، پولشا مەملەكەتتەرىنىڭ 7 حالىقارالىق، 98 رەسپۋبليكالىق جانە 56 ايماقتىق وقۋ ورىندارىمەن 161 ىنتىماقتاستىق مەموراندۋمىنا قول قويدى. «مانساپ كومپاسى» پلاتفورماسى ارقىلى 3000 وقۋشىعا كاسىبي باعدار بەرىلدى، 20 مىڭ وقۋشىعا كاسىپورىن بازالارىنا ەكسكۋرسيالار ۇيىمداستىرىلىپ، 40 مەكتەپ بازاسىندا بەيىندى سىنىپتار اشىلدى.
وڭىرىمىزدە اۋقىمدى ينۆەستيسيالىق جوبالار جۇزەگە اسىرىلىپ، ءوندىرىس ورىندارى اشىلىپ، جاڭا جۇمىس ورىندارى كوپتەپ اشىلۋدا»،- دەدى شاحماردان اسقار ۇلى.
سلەت جۇمىسى بارىسىندا جاستار «قىزىلوردا وبلىسىنىڭ جۇمىسشى جاس ماماندارىنىڭ اسسوسياسياسىن» قۇرۋ باستاماسىن كوتەردى. بۇل باستاما وزگە وڭىرلەردەن كەلگەن قاتىسۋشىلاردى دا قاناتتاندىرىپ، زور قولداۋعا يە بولدى.
جيىن سوڭىندا ەلىمىزدىڭ جانە ايماعىمىزدىڭ الەۋمەتتىك-ەكونوميكالىق دامۋىنا ەلەۋلى ۇلەس قوسقان جاستار ايماق باسشىسىنىڭ العىس حاتىمەن ماراپاتتالدى.
سلەتكە قاتىسۋشىلار وڭىردەگى ءوندىرىس ورىندارىن ارالاپ، وقۋ ورىندارىنىڭ زاماناۋي ماتەريالدىق-تەحنيكالىق بازاسىمەن تانىستى.
جاستار «Orda Glass Ltd» ج ش س شىنى زاۋىتىنا، بەسارىق اۋىلىنداعى وندىرىستىك نىساندارعا، «Qaysar Arena» ستاديونى مەن وقۋشىلار سارايىنا، سونداي-اق تەننيس ورتالىعى، وبلىستىق تاريحي-ولكەتانۋ مۋزەيى، مۋزىكالىق كوللەدج، «اناعا تاعزىم»، «ونەر» جانە «وتباسى ورتالىقتارىنا" باردى.
سونىمەن قاتار، س. ىقسانوۆ اتىنداعى قۇرىلىس جانە بيزنەس، ي. ابدىكارىموۆ اتىنداعى قىزىلوردا پوليتەحنيكالىق كوللەدجدەرىنىڭ وقۋ-وندىرىستىك مۇمكىندىكتەرى مەن جابدىقتالۋ دەڭگەيىن كورىپ، ونداعى ءبىلىم بەرۋ ۇردىسىمەن تانىستى.
ايتا كەتۋ كەرەك، 25 شىلدە كۇنى سلەت قاتىسۋشىلارى بايقوڭىر قالاسىنا ارنايى ساپارمەن بارىپ، الەمگە ايگىلى عارىش ايلاعى مەن تاريحي مۋزەيلەردى ارالايدى. بۇل ءىسساپار جاستارعا عىلىمي-تەحنيكالىق جەتىستىكتەردى ءوز كوزىمەن كورۋگە، سونداي-اق، بايقوڭىردىڭ ەل دامۋىنداعى تاريحي ماڭىزى جايلى مول ماعلۇمات الۋعا مۇمكىندىك بەرەدى.
