بۇگىن وبلىس اكىمى نۇرلىبەك نالىبايەۆتىڭ توراعالىعىمەن مەملەكەت باسشىسىنىڭ جولداۋىنان تۋىندايتىن مىندەتتەردى جۇزەگە اسىرۋ ماسەلەلەرىنە ارنالعان جيىن ءوتتى. وعان قۇقىق قورعاۋ ورگاندارىنىڭ، باسقارمالار مەن اۋماقتىق دەپارتامەنتتەردىڭ باسشىلارى، ءماسليحات دەپۋتاتتارى، ساياسي پارتيالار، ۇكىمەتتىك ەمەس ۇيىمدار، زيالى قاۋىم وكىلدەرى، جاستار، ونلاين بايلانىس ارقىلى قىزىلوردا قالاسى مەن بارلىق اۋدان اكىمدەرى قاتىستى،- دەپ حابارلايدى Dalanews.kz
ايماق باسشىسى جولداۋدا كورسەتىلگەن جەتى باعىت بويىنشا تاپسىرمالار جۇكتەدى.
«مەملەكەت باسشىمىز ەكونوميكانىڭ سالالارىن جاڭعىرتۋ ءۇشىن سيفرلاندىرۋ مەن جاساندى ينتەللەكت تەحنولوگياسىن جەدەلدەتىپ ەنگىزۋ ماسەلەلەرىنە ەرەكشە توقتالدى. جاساندى ينتەللەكتىنىڭ مۇمكىندىكتەرىن قولدانىپ، ەلىمىزدى ودان ءارى وركەندەتۋدىڭ، الەۋمەتتىك-ەكونوميكالىق، يننوۆاسيالىق دامىتۋدىڭ جاڭا باعدارى ايقىندالدى. جاپپاي سيفرلاندىرۋ ارقىلى وتاندىق ەكونوميكانى ءارتاراپتاندىرۋ، كەشەندى تۇردە جاڭعىرتۋ كوزدەلگەن. الداعى ءۇش جىلدا قازاقستاندى سيفرلىق ەلگە اينالدىرۋ ماقساتىندا ناقتى ستراتەگيالىق مەجەلەردى بەلگىلەدى.
وڭىرگە ينۆەستيسيا تارتۋ جۇمىستارى تەك كاسىپكەرلىك جانە ونەركاسىپ باسقارماسىمەن عانا شەكتەلىپ قالماۋى قاجەت. قالا، اۋدان اكىمدىكتەرى مەن ءاربىر باسقارما ءوز سالالارى بويىنشا قارقىندى جۇمىس جاساۋى ءتيىس. وبلىستىق كاسىپكەرلىك جانە ونەركاسىپ باسقارماسى 2026 جىلعا نەگىزگى كاپيتالعا سالىناتىن ينۆەستيسيا كولەمىن بەكىتۋ ءۇشىن ۇسىنىس بەرىڭىزدەر.
ينۆەستورلارعا قولايلى جاعداي جاساۋدا ارنايى ەكونوميكالىق ايماقتىڭ ماڭىزى زور. جاڭادان قولعا الىنعان جوبالاردى كۇندەلىكتى باقىلاۋدا ۇستاپ، سۇيەمەلدەۋ قاجەت.
2025-2027 جىلدارعا ارنالعان اگروونەركاسىپ كەشەنىنە ينۆەستيسيا تارتۋ جول كارتاسىنا ەنگىزىلگەن جوبالاردىڭ ۋاقىتىلى جۇزەگە اسىرىلۋىن قامتاماسىز ەتىڭىزدەر.
اۋىل شارۋاشىلىعى ماقساتىنداعى جەرلەردى مەملەكەت مەنشىگىنە قايتارۋدا وبلىسقا بەكىتىلگەن مەجەنى 100 پايىز ورىنداۋ قاجەت. سۋ رەسۋرستارىنىڭ ءبىرىڭعاي پلاتفورماسىن جاساۋ جۇمىستارىن پىسىقتاڭىزدار. سۋ ۇنەمدەۋ تەحنولوگيالارىن قولدانۋدى ۇلعايتۋعا بولىنگەن قارجىنى ماقساتتى، مەرزىمىندە يگەرۋدى تاپسىرامىن.
وبلىس اۋماعىنان وتەتىن جول قۇرىلىسى جۇمىستارىنىڭ ۋاقىتىلى باستالۋىن باقىلاۋعا الىڭىزدار. سالىنىپ جاتقان، الداعى ۋاقىتتا سالىناتىن نىسانداردىڭ قۇرىلىسىن «ە-قۇرىلىس» اقپاراتتىق پلاتفورماسى ارقىلى جۇرگىزۋ كەرەك.
ءتۇرلى قارجى ينستيتۋتتارى ارقىلى جوبالاردى سۇيەمەلدەۋ، ءىرى كاسىپورىندار اينالاسىندا شاعىن جانە ورتا كاسىپورىنداردى دامىتۋدى جالعاستىرۋ – وتە ماڭىزدى جۇمىس.
جولداۋدا ايتىلعان ماسەلەلەردىڭ ءبىرى – مەملەكەتتىڭ ەكونوميكاداعى ۇلەسىن ازايتۋ. بۇل ورايدا ناقتى ۇسىنىستار ەنگىزىڭىزدەر.
مەملەكەت باسشىمىز جولداۋدا الەۋمەتتىك كومەكتى تەك شىن مۇقتاجدارعا باعىتتاۋدى تاپسىردى. بۇل جۇمىستاردى زاڭ اياسىندا جالعاستىرۋدى تاپسىرامىن»، – دەدى ن.نالىبايەۆ.
جيىندا پاتريوتيزم ۇعىمىنىڭ جاڭا سيپاتى، جاستار ءۇشىن جاسامپازدىق پەن جاڭاشىلدىقتى وتانشىلدىقتىڭ باستى كورسەتكىشىنە اينالدىرۋ تۋرالى سەناتورلار كەڭەسىنىڭ مۇشەسى، قىزىلوردا وبلىسىنىڭ قۇرمەتتى ازاماتى مۇرات باقتيار ۇلى، وڭىرگە ينۆەستيسيا تارتۋ جايىندا وبلىس اكىمىنىڭ ورىنباسارى ارداق زەبەشيەۆ، سۋ ماسەلەسىن شەشۋدە اتقارىلعان جۇمىستار تۋرالى ى. جاقايەۆ اتىنداعى قازاق كۇرىش عىلىمي-زەرتتەۋ ينستيتۋتىنىڭ ديرەكتورى سۇلتانبەك تاۋىپبايەۆ ءسوز سويلەدى.
سونداي-اق، «ابزال ي ك» ج ش س كوممەرسيالىق ديرەكتورى ساعيدۋللا سىزدىقوۆ اگروونەركاسىپ سالاسىن، اگروحابتاردى دامىتۋ، سالانى سيفرلاندىرۋ، ونىمدەردى تەرەڭ وڭدەۋ تۋرالى، قورقىت اتا اتىنداعى قىزىلوردا ۋنيۆەرسيتەتى رەكتورىنىڭ مىندەتىن اتقارۋشى ماينۇر بورىبايەۆا سيفرلاندىرۋ، جاساندى ينتەللەكت باعىتىنداعى جۇمىستار مەن مىندەتتەر تۋرالى بايانداما جاسادى.
ۇلتتىق داستۇرلەردى دارىپتەۋ، جاستاردى رۋحاني قولداپ، باعىت-باعدار بەرۋ جايىندا «قوعام تۆ» تەلەارناسىنىڭ قۇرىلتايشىسى، قازاقستان جازۋشىلار جانە جۋرناليستەر وداعىنىڭ مۇشەسى شاكيزادا ابدىكارىموۆ ءوز ويىن ورتاعا سالدى.
