قىتايدان قازاقستان اۋماعى ارقىلى وتەتىن ترانزيتتىك جۇك تاسىمالى جاڭا رەكوردتىق كورسەتكىشكە جەتتى. 2024 جىلى بۇل باعىتتاعى جۇك كولەمى سوڭعى ون جىلدان استام ۋاقىت ىشىندەگى ەڭ جوعارى دەڭگەي – 15،4 ملن تونناعا جەتكەن. بۇل تۋرالى قازاقستان قارجى مينيسترلىگى مەملەكەتتىك كىرىستەر كوميتەتىنىڭ رەسمي دەرەكتەرىندە كورسەتىلگەن، دەپ حابارلايدى Dalanews.kz.

ساراپتاماعا سۇيەنسەك، قازاقستان ارقىلى قىتايدان ءۇشىنشى ەلدەرگە جەتكىزىلگەن ترانزيت جۇكتەرىنىڭ كولەمى ءبىر جىلدا 22%-عا وسكەن. جالپى العاندا، سوڭعى ءۇش جىل قاتارىنان قىتايدان وتەتىن ترانزيتتىك جۇك تاسىمالى ەكى تاڭبالى قارقىنمەن ۇزدىكسىز وسۋدە. دەگەنمەن سوڭعى جىلدارى ءوسۋ قارقىنى باياۋلاعانى بايقالادى: ماسەلەن، 2022 جىلى ءوسىم 37%، 2023 جىلى 33% بولسا، بىلتىر بۇل كورسەتكىش 22%-دى قۇراعان.

قازاقستان اۋماعى ارقىلى وتەتىن ترانزيتتىك تاسىمالدار بويىنشا جۇڭگو ەڭ نەگىزگى جۇك جونەلتۋشى ەل بولىپ وتىر – ونىڭ ۇلەسى جالپى تاسىمالدىڭ 72 پايىزىن قۇرايدى. دەگەنمەن قىتايدىڭ ءوزى جۇكتەردى قابىلداۋشى ەل رەتىندە قازاقستان ارقىلى وتەتىن ترانزيتتە تەك 2% دەڭگەيىندە عانا.

قىتايدان تاسىمالدانعان ترانزيتتىك جۇكتەردىڭ ارتۋىنا نەگىزگى سەبەپكەر – وزبەكستان مەن ەۋرووداق ەلدەرى. اتاپ ايتقاندا، وزبەكستاننىڭ ترانزيتتىك تاسىمالداعى ۇلەسى ءبىر جىلدا بىردەن 60%-عا ءوسىپ، 5،3 ملن تونناعا جەتكەن. ال ەۋروپا وداعى ەلدەرىنىڭ ۇلەسى بىلتىرمەن سالىستىرعاندا ءتىپتى ەسەلەپ وسكەن – 134%-عا ارتىپ، 2،3 ملن توننانى قۇراعان.

كەرىسىنشە، بۇعان دەيىن باستى باعىتتاردىڭ ءبىرى سانالىپ كەلگەن رەسەيدىڭ قىتايدان قازاقستان اۋماعى ارقىلى ترانزيتپەن قابىلدايتىن جۇكتەرىنىڭ كولەمى ءبىر جىلدا شامامەن 14،7%-عا قىسقارىپ، 3،6 ملن تونناعا دەيىن تومەندەگەن.

وسىلايشا، قازاقستاننىڭ ترانزيتتىك الەۋەتىن دامىتۋدا قىتايدان ەۋروپا مەن ورتالىق ازياعا قاراي باعىتتالعان ساۋدا جولىنىڭ ماڭىزى ارتىپ، بۇل باعىتتاعى تاسىمالدار سوڭعى جىلدارى جاڭا رەكوردتىق كورسەتكىشتەردى جاڭارتىپ وتىر.