ميتينگىدە ۋاقىتشا ۇكىمەتتى تىلەك توكتوگازييەۆ باسقارسىن دەگەن ۇسىنىس ايتىلدى. توكتوگازييەۆ – جاس كاسىپكەر، «اتا مەكەن» پارتياسى اتىنان پارلامەنت سايلاۋىنا قاتىسقان.
اكسياعا قاتىسۋشىلاردىڭ مالىمدەۋىنشە، ولار جاستار اتانىن سويلەيدى جانە ليۋستراسيا تالاپ ەتەدى. بۇنىڭ الدىندا ۇكىمەت ۇيىنە ساياساتكەرلەر كامچىبەك تاشييەۆ پەن سادىر جاپاروۆ، سونىمەن بىرگە «چون كازات» پارتياسىنىڭ وكىلدەرى كىرگەن.
التىنشى قازاندا جوگوركۋ كەنەش دەپۋتاتتارىنىڭ توبى كەزەكتەن تىس جينالىس وتكىزىپ، پرەمەر-مينيستر كۋباتبەك بورونوۆ قىزمەتتەن الىنعانىن حابارلادى، ودان سوڭ دەپۋتاتتار بۇل قىزمەتكە سادىر جاپاروۆتى ۇسىنعان. 6 قازاندا تۇندە جاپاروۆ كولونيادان بوساتىلدى. ونىڭ پرەمەرلىككە ۇسىنىلۋىن كوپشىلىك قولداپ وتىرعان جوق.
دەنساۋلىق ساقتاۋ مينيسترلىگىنىڭ مالىمەتىنشە، بىشكەكتە 6 قازانعا قاراعان ءتۇنى بولعان قاقتىعىستان 768 ادام زارداپ شەكتى، جەتى ادام جانساقتاۋ بولىمىندە جاتىر. 2001 جىلى تۋعان ءبىر جىگىت قازا تاپتى.
5 قازاندا تۇندە نارازى توپ اق ءۇي عيماراتىن باسىپ الدى. ولار قىرعىزستاننىڭ بۇرىنعى پرەزيدەنتى المازبەك اتامبايەۆتى، ەكس-دەپۋتات سادىر جاپاروۆتى جانە باسقا دا شەنەۋنىكتەردى قاماۋدان بوساتتى.
