ءال-فارابي اتىنداعى قازاق ۇلتتىق ۋنيۆەرسيتەتى QS World University Rankings 2025 (QS WUR) حالىقارالىق رەيتينگىندە الەمدەگى توپ-200 جوو قاتارىنا قوسىلدى. بيىل ەلىمىزدەگى كوشباسشى ۋنيۆەرسيتەت توعىز كورسەتكىش بويىنشا 67 پوزيسياعا جوعارىلاپ، 230-ورىننان 163-ورىنعا كوتەرىلدى، دەپ حابارلايدى Dalanews.kz.
قازۇۋ – قازاقستان جانە ورتالىق ازيا جوعارى وقۋ ورىندارى اراسىندا ەڭ ۇزدىك 200 ۋنيۆەرسيتەتتىڭ قاتارىنا ەنگەن العاشقى جانە جالعىز ۋنيۆەرسيتەت.
وقۋ ورداسى وتكەن جىلمەن سالىستىرعاندا اكادەميالىق بەدەل جانە جۇمىس بەرۋشىلەر اراسىندا تۇلەكتەردىڭ سۇرانىسى بويىنشا العا شىقتى. سونىمەن قاتار وقىتۋشىلاردىڭ ءبىلىم الۋشىلارعا اراقاتىناسى، ستۋدەنتتەر سانى، حالىقارالىق زەرتتەۋ جەلىسى، تۇراقتى دامۋ كورسەتكىشتەرى بويىنشا جوعارى ناتيجەلەرگە قول جەتكىزدى.
ايتا كەتەيىك، سوڭعى وقۋ جىلىندا ۋنيۆەرسيتەتتە كەشەندى قۇرىلىمدىق جاڭعىرتۋ جۇرگىزىلىپ، بىرلەسكەن عىلىمي حالىقارالىق زەرتحانالار اشىلدى. جوعارى ستاندارتتارعا سايكەس حالىقارالىق اككرەديتتەۋدەن وتكەن ەكسپەريمەنتتىك ءبىلىم بەرۋ باعدارلامالارى ازىرلەندى. سونداي-اق وقۋ ورداسىنىڭ بازاسىندا شەتەلدىك ۋنيۆەرسيتەتتەردىڭ فيليالدارى اشىلىپ، ءوز جۇمىسىن باستادى.
تۇراقتى دامۋ ماقساتتارىنىڭ بارلىق باعىتتارىن ورىنداي وتىرىپ، قازۇۋ ءبىلىم بەرۋ باعدارلامالارىنىڭ ساپاسىن ارتتىرۋ، يننوۆاسيالىق زەرتتەۋلەر مەن جاڭا تەحنولوگيالاردى جانداندىرۋ بويىنشا جۇيەلى جۇمىستار اتقاردى. الەمدىك ۋنيۆەرسيتەتتەرمەن ىنتىماقتاستىقتى كەڭەيتۋ، اكادەميالىق ۇتقىرلىق، الەۋمەتتىك ارىپتەستىكتى دامىتۋ سالاسىندا دا ىلگەرى قادامدار جاسالدى.
جاڭا وقۋ جىلىندا 10 مىڭ ستۋدەنت قابىلدانىپ، ءبىلىم ءۇردىسىن ينتەرناسيونالداندىرۋدا جانە ءبىلىم بەرۋ باعدارلامالارىنىڭ ساپاسىن ارتتىرۋدا تابىستى جۇمىستار جۇرگىزىلدى.
قازۇۋ-دىڭ QS WUR حالىقارالىق رەيتينگىنە ءداستۇرلى تۇردە قاتىسۋى ءبىلىم ورداسىنىڭ الەۋەتىن جان-جاقتى باعالاۋعا مول مۇمكىندىك بەرەدى. سونىمەن قاتار قىزمەتىن ودان ارى دامىتىپ، جەتىلدىرۋگە، جاڭا ىزدەنىستەر جاساپ، ىنتالاندىرۋعا جول اشادى.
بيىل QS World University Rankings 2025 (QS WUR) حالىقارالىق رەيتينگىنە قازاقستاننىڭ 21 جوعارى وقۋ ورنى ەنگەن بولاتىن. بەس قازاقستاندىق جوعارى وقۋ ورنى ءوز پوزيسيالارىن جاقسارتىپ، ءتورت جوعارى وقۋ ورنى ءوز ورنىن ساقتاپ قالدى.
