Ál-Farabi atyndaǵy Qazaq ulttyq ýniversiteti QS World University Rankings 2025 (QS WUR) halyqaralyq reitinginde álemdegi TOP-200 JOO qataryna qosyldy. Biyl elimizdegi kóshbasshy ýniversitet toǵyz kórsetkish boiynsha 67 pozitsiiaǵa joǵarylap, 230-orynnan 163-orynǵa kóterildi, dep habarlaidy Dalanews.kz.
QazUÝ – Qazaqstan jáne Ortalyq Aziia joǵary oqý oryndary arasynda eń úzdik 200 ýniversitettiń qataryna engen alǵashqy jáne jalǵyz ýniversitet.
Oqý ordasy ótken jylmen salystyrǵanda akademiialyq bedel jáne jumys berýshiler arasynda túlekterdiń suranysy boiynsha alǵa shyqty. Sonymen qatar oqytýshylardyń bilim alýshylarǵa araqatynasy, stýdentter sany, halyqaralyq zertteý jelisi, turaqty damý kórsetkishteri boiynsha joǵary nátijelerge qol jetkizdi.
Aita keteiik, sońǵy oqý jylynda ýniversitette keshendi qurylymdyq jańǵyrtý júrgizilip, birlesken ǵylymi halyqaralyq zerthanalar ashyldy. Joǵary standarttarǵa sáikes halyqaralyq akkreditteýden ótken eksperimenttik bilim berý baǵdarlamalary ázirlendi. Sondai-aq oqý ordasynyń bazasynda sheteldik ýniversitetterdiń filialdary ashylyp, óz jumysyn bastady.
Turaqty damý maqsattarynyń barlyq baǵyttaryn oryndai otyryp, QazUÝ bilim berý baǵdarlamalarynyń sapasyn arttyrý, innovatsiialyq zertteýler men jańa tehnologiialardy jandandyrý boiynsha júieli jumystar atqardy. Álemdik ýniversitettermen yntymaqtastyqty keńeitý, akademiialyq utqyrlyq, áleýmettik áriptestikti damytý salasynda da ilgeri qadamdar jasaldy.
Jańa oqý jylynda 10 myń stýdent qabyldanyp, bilim úrdisin internatsionaldandyrýda jáne bilim berý baǵdarlamalarynyń sapasyn arttyrýda tabysty jumystar júrgizildi.
QazUÝ-dyń QS WUR halyqaralyq reitingine dástúrli túrde qatysýy bilim ordasynyń áleýetin jan-jaqty baǵalaýǵa mol múmkindik beredi. Sonymen qatar qyzmetin odan ary damytyp, jetildirýge, jańa izdenister jasap, yntalandyrýǵa jol ashady.
Biyl QS World University Rankings 2025 (QS WUR) halyqaralyq reitingine Qazaqstannyń 21 joǵary oqý orny engen bolatyn. Bes qazaqstandyq joǵary oqý orny óz pozitsiialaryn jaqsartyp, tórt joǵary oqý orny óz ornyn saqtap qaldy.
