Resei prezidenti Vladimir Pýtin Qazaqstanǵa memlekettik saparmen keledi. Aqordanyń habarlaýynsha, sapar 27-29 mamyr kúnderine josparlanǵan jáne ol Qazaqstan Prezidenti Qasym-Jomart Toqaevtyń shaqyrýymen ótedi, dep habarlaidy dalanews.kz.
Resei prezidentiniń kómekshisi Iýrii Ýshakovtyń aitýynsha, Vladimir Pýtin 27 mamyr kúni keshke Astanaǵa keledi. Al 28 mamyrda Qazaqstan Prezidenti Qasym-Jomart Toqaevpen tar jáne keńeitilgen quramda kelissózder ótkizýi josparlanǵan.
Kelissózder barysynda taraptar Qazaqstan men Resei arasyndaǵy jan-jaqty strategiialyq seriktestik pen odaqtastyq qatynastardyń qazirgi jai-kúiin, sondai-aq ony odan ári nyǵaitý múmkindikterin talqylaidy. Aqorda málimetinshe, sapar aiasynda 28 mamyrda Eýraziialyq ekonomikalyq forým, al 29 mamyrda Joǵary Eýraziialyq ekonomikalyq keńestiń otyrysy ótedi.
Kezdesý qorytyndysy boiynsha birqatar qujatqa qol qoiylyp, buqaralyq aqparat quraldary úshin birlesken málimdeme jasalýy múmkin. Resei delegatsiiasynyń quramynda ministrler, iri kompaniialar men memlekettik korporatsiialardyń ókilderin qosa alǵanda 30-dan astam adam bolatyny aityldy.
Sapar barysynda eki el arasyndaǵy saýda-ekonomikalyq bailanystar, ónerkásip, kólik-logistika, energetika jáne óńirlik kún tártibindegi ózekti máseleler talqylanady dep kútilýde.
