2025 جىلدىڭ II توقسان قورىتىندىسى بويىنشا، كاسىپكەرلىك قىزمەتپەن اينالىساتىن شاعىن كاسىپورىنداردى ساناماعاندا ءبىر جۇمىسشىعا شاققانداعى ورتاشا ايلىق جالاقى 448،6 مىڭ تەڭگە بولدى. 2024 جىلدىڭ وسى كەزەڭىمەن سالىستىرعاندا بۇل كورسەتكىش نومينالدى تۇردە 11،3% ءوستى. الايدا ناقتى مانىندە، ياعني ينفلياسيانى ەسكەرسەك، وزگەرىس جوق، دەپ حابارلايدى Dalanews.kz DATA HUB-كە سىلتەمە جاساپ.

ءبىرىنشى نەسيەلىك بيۋرونىڭ مالىمەتىنشە، بۇعان دەيىن قاتارىنان ينفلياسيا بويىنشا سەگىز توقسان بويى ءوسىم بايقالعان ەدى.

"ناقتى جالاقىنىڭ الدىڭعى جىلدىڭ سول توقسانىمەن سالىستىرعاندا ءبىر دەڭگەيدە قالۋى 2015 جىلدىڭ باسىنان باستاپ جۇرگىزىلگەن باقىلاۋلار تاريحىندا العاش رەت تىركەلىپ وتىر. جالپى، بۇل كورسەتكىشتىڭ ادەتتەگى جىلدىق ديناميكاسى — ءوسىم. سوڭعى 7،5 جىل ىشىندە تومەندەۋ تەك ەكى رەت بولعان، ەڭ سوڭعىسى – 2023 جىلدىڭ I توقسانىندا (-0،6% جىلدىق كورسەتكىش). سايكەسىنشە، ءساۋىر–ماۋسىم ايلارىندا ناقتى جالاقىنىڭ جىلدىق ءوسىمى توقتادى. جالپى كارتينانى تولىقتىرساق: وسى سەگىز توقساندىق ءوسىم كەزەڭىندە قارقىن ونشا جوعارى بولمادى — ورتا ەسەپپەن +2،5%"، - دەيدى ساراپشىلار.

DATA HUB جالپى كورسەتكىشتى ەڭ كوپ تومەندەتكەن قۇرىلىس سالاسى بولدى، مۇندا ناقتى جالاقى ءبىر جىلدا بىردەن 10،8% قىسقاردى (قازىرگى نومينالدى ءمانى – 490،2 مىڭ تەڭگە). قۇرىلىستان بولەك، ينفلياسيانى ەسكەرگەندەگى جالاقى تاعى التى سالادا ازايدى، سونىڭ ىشىندە ءبىلىم بەرۋ مەن دەنساۋلىق ساقتاۋ سالالارىندا – ەكەۋىندە دە 3،1% (تيىسىنشە 373،8 مىڭ تەڭگە جانە 339،6 مىڭ تەڭگە).

بۇعان دەيىن 1 تامىزداعى جاعداي بويىنشا ەلىمىزدە مىڭداعان قازاقستاندىق 1،3 ملرد تەڭگە جالاقىسىن الا الماي جۇرگەنىن جازعانبىز.